Aktîvîsto kurd Mehmet Çakaso ke Çewlîgî ra yo kanûnê 2022yî de waştişê Almanya ser o Îtalya de amebi destbendkerdene û adara 2023yî de zî erşawîyabi Almanya. Nîsana 2024î de zî Mehkemeya Berze ya Celle bi îdîaya ‘’Endamîya PKKyî’’ cezaya 2 serran û 10 mengan dabî Çakasî. Çakas nika Zîndanê Uelzenî de tepişîyeno û ganî o 4ê teşrîna verêne ya 2025î de vera bidîyo.

La muracatê ey ê îltîcakerdişî hetê Dayîreyê Multecîyan û Koçî yê Federalî (BAMF) ra amebi redkerdene. Mehkemeya Îdareyî ya Luneburgî zî muracatê îtîrazî yê vera bira teberkerdişî verî ke biercna red kerd. Hewteyê vîyarteyî de Serdozgerîye înfazê ceza ra fek vera da û verê prosesê teslîmkerdişê Tirkîya akerd.

Keyeyê Çakasî vera prosesê teslîmkerdişê Tirkîya nêrazîbîyayîşê xo mojna û hişyar kerd ke ‘’Rîsko cidî dewam keno.’’ Keyeyê ey pare kerd ke no kerdişo muxtemel tewirêko huqûqî ney sîyasî yo û ê do bira teslîmkerdişî qebul nêkerê. Keyeyî vat: ‘’Tewirê Almanya yê winayênî ma qerqilnenê.’’

Eşkerayîya keyeyî de wina ame vatene: ‘’Nika bi hawayêkê cidîyî rîsk dewam keno ke Mehmet Çakas teslîmê Tirkîya bêro kerdene. Yeno kerdene ke bi çalakîyan verê ney bêro girewtene. Ma sey keyeyî na bire huqûqî ney sîyasî vînenê. Bi taybetî wextê xîretanê seba prosesê çareserîye de kerdişê winayênî do zerar bidê prosesî. Ma bira mehkemeya Almanya şermezar kenê û qebul nêkenê. Nê wextî de ke beno ke meseleya kurdan bi rayîr û metodanê demokratîkan do bêra çareserkerdene tewirê dewletanê Ewropa yê vera kurdan qerqilnenê.’’

Avûkata Çakasî Cornelia Ganten-Lange vera bira teslîmkerdişî Mehkemeya Qanûnê Bingeyî ya Almanya rê muracato lezabez kerdbi. Wina pawîyeno ke bire rojanê verê ma de do vejîya.