Xespêkerdişê Şaredarîya Sêrtî ame protestokerdene. Hemserekê Pêroyî yê DEM Partî Tuncer Bakirhanî û Hemserekê Pêroyî yê DBPyî Keskîn Bayindir tewrê çalakîye bîyî. Parka Demokrasî ra heta verê şaredarî ke binê ablûqaya polîsa de ya, rayraşîyayîş ame kerdene.

Hemserekê Pêroyî yê DEM Partî Tuncer Bakirhanî nê vatî: ''Ma reyna rîyê darbeyêka sîyasîye ra, vera xespê qeyûmî Sêrt de yê. Dizdî nêqeflîyenê, bîlasebeb îradeyê şarî xesp kenê. Şarê Sêrtî tim wayîrê îradeyê xo vejîyeno la ê nêşarmîyenî qeyûm tayîn kenê. Walî Kemal Kizilkayî zî nêşarmîyeno, bi wîyayîş û vilakerdişê şekerî ca dano xo. Sêrt rayê xo to nêdayî. Şima se kenê bikerê nêeşkenê dizdîya xo binimnê.

Ma bi aşman o qala dîyalogî kenê, vanê muzakere. Ma vanê çareserîya demokratîke ya meseleya kurdan, ê vanê qeyûm. Wina  haştîye nêbena.  Bi qeyûm, qetilkerdiş, hepskerdiş, çînhesipnayîşê kurdan haştîye nêbena. Hetêkî ra qeyûm hetê bînî ra muzakare nêbeno. Hinî bi qeyûm û çînhesibnayîşê îradeyê kurdan şima nêeşkenê gamêke zî aver şirê. No zîhnîyetê qeyûmî do rojêke miheqeq verê îradeyê kurdan de milê xo çewt bikero.''

Hemserekê Pêroyî yê DBPyî Keskîn Bayidir zî nê vatî: ''Nê îşxalkerî hîrê rey o ke dest nanê îradeyê şarî kurdî ser. Welatê huqûqî de çîyê wînayên nêbenî. Na dewlete kolonyalîst a. Şarê kurdî nê qebul nêkeno. Anqara de vanê 'ma yenê werê' pratîk de dişmenîye kenê. Vera dişmenîye û dirîtîye tecrubeyê ma est o. Birêz Ocalan vano 'No proses muhîm o. No semedê Tirkîya firseto gird o.' La îşxalkerî nê firsetî bi dişmenîye xerc kenê. Ma tîya ra veng danê: Nê firsetê çareserî semedê menfeatê xo xerc mekerê. Xespkerdişê şaredarîyanê kurdan îşxal o. Ma îşxalî qebul nêkenê. Ma sey tim sereberz xover danê. Ma do heta serkewtişî xover bidê.''