Mêrdîn de îşxalê vera şaredarîyan bi rayraşîyayîşî ame protestokerdene. Saetanê nîmeroje ra nata şar verê banê DEM Partî de gerîya binê ablûqa. Reyna Parka Karayollari cayê destpêkerdişê rayraşîyayîşî zî gerîya binê ablûqa. Dekewtişê şarî yê parke ame astengkerdene û kesê ke parke de bî tira ameyî vetene. Şar verê barîkatan de ame têhet û bi sloganan vergirewtişê polîsan şikit û dest pê rayraşîyayîşî kerd.

Rayraşîyayîşo ke bi hezaran kesî tewrê ci bîyî de pîya bi slogananê  “Bijî berxwedana gelê Kurd”, “Bimre koletî bijî azadî”,  “Jin, Jiyan, Azadî”, “Ma do bi xoverdayîşî ser bikewê ” marşê sey Herne Pêş, Çîyayê Bagokê, Serhildan Jiyanê zî ameyî vatene.

Hemşaredarê Bajarê Pîlî yê Mêrdînî Ahmet Turk û Devrime Demir ê ke wezîfeyê înan ame xespkerdene , Hemşaredarê Bajarê Pîlî yê Wanî Abdullah Zeydan, wekîl û hemaşaredarê DEM Partî zî tewrê rayraşîyayîşî bîyî. Badê rayraşîyayîşî polîsî mecbur mendê ke rayîrî trafîkî rê biqefilnê. Kuçeyanê Mêrdînî bi hezaran kesî heta verê banê DEM Partî şîyî.

Badê rayraşîyayîşî Hemşaredar Ahmet Turkî qisey kerd. Turkî vat: '' Şarê kurdî rixmê kayanê leyminan ê dewlete wayîrê heqanê xo, ameyox û azadîya xo vejîyeno. Ge destê xo derg kenê ge çuye mojnenê ra. Wazenê bi çuyeyî vengê kurdan kêm bikerê û erjanê ci ra bifînê dûrî. Şarê kurdî polîtîze bîyo. Ne çew eşkeno kurdan bixapînê ne zî têkoşînê ci ra raqilno. Ma hêvî gird kenê, haştîye û ameyoxî gird kenê.''

Hemşaredare Devrime Demir zî vat: ''Nê hêzê tarî do vîn bikerê û ma ser bikewê. Ma pêrune 8 serrî pratîkê qeyûmî dî. Qeyûm talan o, qeyûm dizdî ya, qeyûm destsernayîşê îradeyê şarê kurdî yo. Wa her kes bizano ke ma do têkoşînê azadîye yê cinîyan, modelê şaredarîyan û têkoşînê şarê xo ra peyser game meerzê.''

Hemşaredarê Wanî Abdullah Zeydan zî wina vat: ''Seba ke dîzdîya xo rê dewam bikerê şaredarî de qeyûm ca kerd. Qet îşxalkerêk şaran ra girdêr nîyo.Şar wayîrê partîya xo vejîyeno. Eke ma wayîrê îradeyê xo vejîyê ma reyna eşkenê îradeyê xo destê qeyûman bigîrê. Ma do reyna ser bikewê.''