Amed de serkêşîya DEM Partî, DBP û TJA de vera xespkerdişê şaredarîyanê Êlih, Mêrdîn û Xelfetî bi şîarê ''Qeyûm ney demokrasî'' rayraşîyayîş ame kerdene. Hemsereka Pêroyî ya DEM Partî Tulaye Hatimogullari, Hemsereka Pêroyî ya DBP Çigdeme Kiliçgun Uçar, hemşaredarî û temsîlkarê rêxistinanê komelê sîvîlî tewrê rayraşîyayîşî bîyî.

Bi hezaran kesê ke Meydanê Şêx Seîdî (Dagkapi) de ameyî têhet ver bi Burcê Kênayan rayra şi. Kuçeyê Amedî bi sloganan ''Jin Jiyan Azad'' û ''AKP do hesab bido şarî'' zimayî.

Hemsereka Pêroyî ya DEM Partî Tulaye Hatimogullari xoverdayîşê şarê Amedî selam kerd û nê vatî: ''Heta ke no xoverdayîşê şima na herre qeyûman ra pak bikero, ma do pêro pîya dewam bikerê. Qeyûm darbe yo, qeyûm xesp o. Qeyûm diznayîşê îradeyê şarê kurdî û şaranê bînan o. Qeyûm sere de şarê kurdî nê welatî de dijnayîşê heqê vîjnayîşê şaran o. Cayê qeyûmî qanûnan de çîn o. No îqtîdar bi qeyûman sûc keno. Qeyûm goreyê pêkerdişanê mîyanneteweyîyî zî nîyo ke Tirkîya hetê ci ya. Qeyûm bi qala kilme qorsanî, çetekarî, dizdî ya.

Ma sey DEM Partî sey vizêrî ewro zî vanê wa tecrîd bêro wedaritene, Birêz Ocalan bibo azad. Ewro Serekê Pêroyî yê MHPyî zî nê bi tewirê bînî ano ziwan. Ma reyna Amedî ra vanê ke ma wazenê we meseleya kurdan zemînê haştîye û demokrasî de bêra çareserkedene. Ma veng danê îqtîdarî. Hinî bes o, ezîyeto ke şima kurdan rê kerdo bes o. Hinî bes o kayan caverdê. Kurdî têkoşînê xo yê bianorî canêverdenê. Haştîye hêz o, haştîye bianor a, cesûr a,bitesîr a. Ê ke qeçex pêrodayîş kenê haştîye ra tersenê.  Ma sey şarî haştîye wazenê.

Wayîrvejîyayîş Narîne zî têkoşînê haştîye yo. Vervejîyayîşê vêşanîye û feqîrîye, vervejîyayîşê qirkerdişê cinîyan zî têkoşînê haştîye yo. Wa no bêro zanayene ke ma qet yew warî ra peyser nêancîyenê. Her ca de sey her wextî ma do têkoşînê xo bidomê. Ma do bi xoverdayîşî ser bikewê, ma do pêro pîya haştîya bianore ronê.''