Vengdayîşê Rayber Apoyî û perspektîfo ke erşawito Kongreya 12ine ya PKKyî ser o nîqaşî dewam kenê. Serekê Partîya Têgêrayîşê Kedkarî (EHP) Hakan Ozturkî derheqê babete de ajansê ma rê qisey kerd.

Ozturkî bale ante ser ke qiseyê ‘Sosyalîzmê komelê demokratîkî de israr merdimatîye de israr o’ cayê kêfweşîye yo û vat: ‘’Dinya de nika hêzo ke tewr zaf sosyalîzm paweno PKK yo. Birêz Ocalanî perspektîf de qalê neteweya demokratîke keno ke awankerdişê na netewe do dinya rê bibo nimûne. Perspektîfê Ocalanî awankerdişê enternasyonelî heq keno. Xora sey Marksîstan ma dewleta neteweyîye nêpawenê. Eke welatêko hempar, cografyayêka hempare bêrê awankerdene sey Marksîstî ez do heta peynî paştî bida ney. Senî ke Bolşevîkan, Lenînî waşt ke Rûsya biba welatêkê hemparî ma zî ney wazenê.

Çareserîya barbarîye û şerî enternasyonalîzm o. Awankerdişê awanîyêka enternasyonalî destpêkê karan o. Xora bi awankerdişê Îtîfaqê Kede û Azadîye armancê ma no bi. Ma vat ke yewbînan de tecrubeyanê xo pare bikerê. Pêşnîyazê awankerdişê enternasyonalêkî pêşnîyazêko aver o ke ez sey Marksîstêkî ney zaf pozîtîf vînena. Têgêrayîşê kurdan wayîrê hêzêkê pîlî yo. Bi nê hêzê pîlî vengdayîşê enternasyonakêkî yeno kerdene. ‘’

Ozturkî da zanayene ke Têgêrayîşê Azadîye yê Kurdan ewro wayîrê hêzêkê girîngî yo û vat: ‘’Senî ke wextêk her çi rûsan ra ameyêne persayene nika zî kurdan ra yeno persayene. Kurdî bi rûmetdarî eşkenê her çî bigêrê xo milî. Ewro Rojawan de serkewtişê kurdan fekê her kesî de yo, Tirkîya de zî wina yo. Kurdî laîkîye anê ca. Kurdî eşkenê enternasyonalîzmî zî bivisnê rojdemî. Têgêrayîşê Kurdan pêlêko winayên o ke her kes eşkeno tede bi rengê enternasyonalîstî têbigêro. Kurdan tim wayûbiratîya şaran pawite û qetî vera neteweya serwere dişmenîyêka qijkeke nêkerde.’’