Ronayoxanê PKKyî ra Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanîye Leyla Şaylemez (Ronahî) ê ke Paris de ameybî qetilkerdene, serrgêra 8. ya qirkerdişî de verê Buroyê Ernformasyonî yê Kurdîstanî de ameyî vîrardene.

Çalakîya ke hetê Têgêrayîşê Cinîyan ê Kurdan û Konseya Demokratîke ya Kurdan a Fransa ra ameye organîzekerdene sîyasetmedarê fransizî, temsîlkarê dezgehanê kurdan û dostê kurdan tewrê ci bîyî. Çalakî verê Merkezê Komelê Demokratîkî yê Kurdan de bi rayraşîyayîşî dest pêkerde. Bi pankart, fotografanê hîrê cinîyan ê şorişgêran û sloganan heta verê Buroyê Ernformasyonî yê Kurdîstanî rayraşîyayîş ame kerdene. Tîya merasîmê yadkerdişî bi rêzgirewtişî dest pêkerd. Dima ra cayê qirkerdişî de vilikî ameyî ronayene.

Çalakî de bi nameyê Têgêrayîşê Cinîyan ê Kurdan Nupele Munzur qisey kerd. Munzure  veng da mekamanê Fransa û vat ma na bêcazayîye do çirey qebul nêkerê û waşt ke wa dîktator bêro hukmkerdene. Munzure vat: ''Şexsê nê hîrê embazanê ma de hêrişê şar û têgêrayîşê ma kerd. No hêriş vera Rayberîya ma yo. Ma zanê ke fermanê nayî Erdogan û dewleta tirke dayo. Heta ke o nêro hukmkerdene do qirdkerdiş dewam bikero.''

Hetkara Sereka Şaredarîya Pîle ya Parisî Helere Bidard zî waşt ke wa qetilkarî bêrê hukmkerdene û vat: ''Ma wextê qirkerdişî ra nata semedê caardişê edaletî mucadele kenê. Hîrê cinîyî, hîrê sîyasetmedarê temsîlkarê haştîye mabênê Parisî de ameyî qetilkerdene. Ma do xo vîrî nêkerê.''

Maya Sakîne Cansiz zî mesajê vengî tewrê merasîmî bîye. Dayîke Cansize vat: ''Ez pê kênaya xo sereberz a. Kênaya mi durust bî, rind gureyayêne. Ez embazanê aye selam kena. Şima emanetê Sakîne yê. Ez pê şima sereberz a.'' Badê mesajî sloganê ''şehîdî nêmirenî'' bîyî berz.

Verê merasîmî portreyê hîrê cinîyan o ke Zehra Dogan amade kerdbi banê şaredarîye yê herêma 10. de ame daliqnayene.