Birayî Abdulkerîm û Ahmet Talliyê ke Mexmûrî rê îltîcaya Swîsre kerdbi, hetê Swîsre ra teslîmê Tirkîya benê. Av. Husnu Yilmazî ard ziwan ke bi nê hawayî qanûnî binpay benê û weşîya ganê înan binê tehlukeyî de yê.
Birayî Abdulkerîm û Ahmet Talli 4 serrî verî Mexmûrî rê îltîcaya Swîsre kerdbi. Swîsre bire daye ke wird birayî tirkîya rê bêrê teslîmkerdene.
Birayî 4 serran ra nata Kantonê Aarauyî de kampe de manenê. 3 serrî verî birayî vengdayîşî ser o şîbî asayîş la polîsêko ke aslê xo de tirk o açarnayoxan nêda înan û vato: ''Kampa Mexmûrî yê terorîstan a.''
Mengêke verî mehkeme waştişê îltîca yê birayan red kerd û bire daye ke 24ê kanûne de wird birayî tirkîya rê bêrê teslîmkerdene.
Birayan vera bire nêrazîbîyayîşê xo mojna û da zanayene ke înan nufusê Tirkîya ser o qeydkerde nîyê.
Abdulkerîm Talliyî vat: ''Dewleta tirke bi serran ma rê zulm kerd, keyeyê mi kişt. Eke ma bierşawîyê Tirkîya no yeno manaya kişîyayîşê ma. Keyeyê ma zulmê Tirkîya rê serra 1994î de şi Mexmûr. Mi mehkeme de zî vat ez tirkîyayîj nîya. Eke ez Tirkîya de bêra kiştene mesuldara ci Swîsre ya. Dewleta tirke ma rê vana 'terorîst.' Ez na bire qebul nêkena. Ma do bigêrê heqê xo.''
Avûkatê birayan Husnu Yilmazî eşkera kerd ke na bire huqûqî nîya û vat: ''Kampa Mexmûrî kampa Neteweyan ê Yewbîyayeyan a. Coka ê neçar ê ke heqê îltîca bidê birayan. Kampa Mexmûrî tim bîye hedefê hêrişanê dewleta tirke. Swîsre zî na rewşe hol zanena. Eke nê wird birayî teslîmê Tirkîya bibê do bêrê kiştene. Seba ke na xeletîya Swîsre bêra raştkerdene ma kampanyaya îmzayan daye destpêkerdene. Wird birayî zî nika pabeyê paştdayîşî yê û têkoşînê xo yê huqûqîyî dewam kenê.''
