Dewa Melegerî ya qezaya Gîyadînî ya Agirî de şîrketa Koza rixmê nêrazîbîyayîşê şarî zî bi sîyanurî gêrena madenê zerdî. Cigêrayîşê bi sîyanurî 2009î ra nata yenê kerdene. Muhendîsa şîrkete Nîlufere Gumuş o çax waşt ke bi dewijan kaxidêkê vengî bida îmzakerdene. La dewijan no nêkerd û nêverda ke dewe de xebatê cigêrayîşî bêrê kerdene.

Şîrketa Koza nêrazîbîyayîşê dewijan û tedaya rayaumûmîye ra dima xebatê xo vindarnabî. La dima şîrkete newe ra xebatî dayî destpêkrdene û seba ney Hindîstan û Pakîstanî ra karkerî ardî. Şîrkete seba karkeran zî 150 meskenî înşa kerdî. Eke şîrkete wina dewam bikera dewe do bêra xalîkerdene.

Akîvîstê Yewîya Ekolojî Fatîh Şahînî vera cigêrayîşê bi sîyanurî nêrazîbîyayîşê xo mojna û vat: ''Erd serûbin beno. Tesîrê jehrê sîyanurî bi se serran manenê. Sîyanur zerar dano nebatan û çimeyanê awe. Raporê ÇEDî est ê. Bi raporanê îlegalan şîrketî AKPyî ra destûr gênê. Xozaya ma qurbanê rantî yenê kerdene. Sîyanur zîret û heywankarîyî zî qedîneno. Wa dewijî hişyar bibê. Ganî pêro rayaumûmîye na babete de hîsger biba. Ganî ma vera ney têbigêrê.''