Fermandarê Qerargehê MPŞyî Murat Karayilanî  bi wesîleya serrgêra ronîyayîşê PKKyî 27ê Teşrîna Peyêne venga gerîlayan da. Karayilan vengdayîşê xo de nê noqtayan ser de vindert:

''Ez serrgêra 46ine ya ronîyayîşê partîya ma fîraz kena. Ez Rayber Apoyî selam kena. Ma serra 47ine ya partîya xo de pêro hemra û embazan rê têkoşînê înan de serkewtiş wazenê. Şexsê şehîdê ma yê verênî Hakî Karerî de û şexsê şehîdanê ma yê fedayîyan Asya Alî û Rojger Hêlînî de ma pêro şehîdanê xo bi rêz û minetî yad kenê.

Kurdîstan de heta serranê 1970an tarîye serdest bîye.. 1973 de Rayber Apo mîyanê şertanê zehmetan de kewt rayîr. Ey hêverî fikrê Apogîrî aver berd. Apogîran ra embazê ma Hakî Karer 18ê gulana 1977î de şehîd bi. Dima 19ê gulana 1978î de embazê ma Halîl Çavgun şehîd bi. Dişmenî o çax bi pêro îmkananê xo hêrişê embazanê ma kerdêne. Na rewşe de dewa Fisî ya Licê de PKKyî kongreya xo ya ronîyayîşî kerde. Partîbîyayîşê ma yew bira xoverdayîşê neteweyî bi. PKK ê çaxî ra nata 46 serran ra nata nê şerî keno.

PKK têgêrayîşêkê Rayberîye yo. Rayber Apoyî hetêkî ra qerardarî û xorinîye awan kerde hetê bînî ra perwerdeyê kadroyanê verênan kerd. Nê kedan Zîndanê Dîyarbekîrî de îradeyê xo mojna, şer de xo ver da, Hemleya 15ê Tebaxe kerde û têkoşîn resna nê rojan.

1998 de hêzanê mîyanneteweyîyan mudaxeleyê Rayberîye kerd, dima komplo ard ca. La Rayber Apoyî û têgêrayîşê ma bi xoverdayîşê xo komplo pûç kerd, têkoşîn pîlêr kerd. Têgêrayîşê ma 26 serrî yo wina vera komployî têkoşîn keno.

Dewleta tirke destpêkî ra nata qetî bi sereyê xo vera ma şer nêkerd. Tim peyê ci de NATO, xayînî û hêzê bînî est bîyê û est ê. Coka serkêşîya Rayber Apoyî îradeyo ke PKKyî mojna ra îradeyê serkewtişî yo. 

Bi taybetî 9 serranê peyênan de dewleta tirke bi konseptê neweyî û bi destekê mîyanneteweyîyî vera ma şerê topyekûnî kena. Vera ma çekê kîmyewî û çekê nuklerî şuxilîyenê. Îmrali de zî dewlete vera Rayber Apoyî şerê giranî kena û nê şerî vilayê her cayî kena. 

La Rayber Apoyî vera nê hêrişan xoverdayîşêko bêemsal kerd. Gerîlayan her ca de xo ver da û verê armananê dişmenî girewt. Dewleta tirke tay cayî îşxal kerdî zî têgêrayîşê ma mewzîyê xo pawitî.

Xoverdayîşê ma dewleta tirke vista binê zorîye. Rejîmê dewleta tirke mîyanê krîz û kaosan de yo. Şar polîtîkayanê şerî ra vêşan mendo. 

Hetê bînî ra Rojhelatê Mîyanênî de Şerê Dinya yo 3in xorin beno. Netîceya nê şerî de herême de dîzayno newe do bêro kerdene. Têgêrayîşê ma zî wayîrê ê îmkanan o ke na rewşe de hemleyanê xo bîyaro ca. Tîya de îqtîdarê AKP-MHPyî di çîyan ra terseno; do nêeşko têgêrayîşê ma tasfîye bikero, têgêrayîşê ma do firsendan ra fayde bivîno û hemleyanê neweyan bikero.

Îqtîdaro faşîst coka kewto panîk û keno ke verê nînan bigêro. Coka bi fekê Devlet Bahçelîyî vengdayîşî ameyî kerdene. Dewleta tirke hendê teng bîya ke Bahçelîyî venga Rayberîye dayo. Têgêrayîşê ma û kadroyanê ma vat ke muxatabê çareserîye Rayber Apo yo. Ma vat ke proseso ke Rayber Apoyî îdare bikero, ma peyê ci de yê. La dewleta tirke gamêka zelale nêeşte.

Tayênan zî wina îdîa kerd ke Rayberîye ra mesajî şinê yenê ma. Çîyo winayên çin o. Ne ma ra ne zî Rayberîye ra ver bi ma mesajêk ame. Bi xeberanê wina zûran yeno îdîakerdene ke seke proses est o. Ma xora Rayber Apoyî sey îradeyê xo vînenê. Rejîm keno ke pê spekulasyonan mîyanê têgêrayîşê azadîye de nakokîyan vejo. Nê xîretî pûç ê. Rayberê têkoşînê azadîye yê Kurdîstanî Rayber Apo yo û bi metodanê şerê taybetî na raştîye nêvurîyena.

Hetêkî ra Bahçelîyî wina qisey kerd hetê bînî ra înan şaredarîyanê kurdan rê qeyûmî tayîn kerdî. Hêrişê vera gerîlayan dewam kenê, Erdogan hema zî Rojawanî tehdît keno. Yanî nîyetê înan seba çareserîya raştikêne çin o! Seba çareserîya meseleya kurdan ganî gamê zelalî bierzîyê. Nika werte de çareserîye çin a la hêrişî est ê.

Ancî zî hetê Bahçelîyî ra azadîya Rayber Apoyî ameye rojdemkerdene. Hinî naye ra apey nêşino. Netîceya têkoşîn û xoverdayîşê şarê ma de azadîya Rayber Apoyî wina bîye rojdem. Rayber Apo binê tecrîdî de Omer Ocalan de pêvînayîş kerd. Tecrîd dewam keno. Pêvînayîşê bi Omer Ocalanî ra dima zî qedexeyê pêvînayîşî dîya Rayber Apoyî, qeyûmî ameyî tayînkerdene. 

Eşkera yo dewlete kena ke Rayber Apoyî ser o taktîkê teda bişuxilna. La dewlete do nêeşka ney ra netîce bigêra. Wa dewlete na taktîkî ra fek vera bida. Nêbo bedelê ci seba dewlete do giran bibê.

Derdê dewleta tirke gerîla yê. Dewlete wazena ke wa gerîlayî çekanê xo ronê.  Heta ke Kurdîstan de hêriş û qirkerdişî est bê gerîlayî zî do est bê. Ma sey têgêrayîşî çareserîye wazenê. La seba çekverdayîşê gerîlayan hêverî ganî gonîye bêra vindarnayene.

Dewleta tirke ronîyayîşê PKKyî ra nata kena ke gerîlayan tasfîye bikera. Eke dewlete raşta zî çareserîye wazena wa têdûştîye, edalet û azadîye bîyara ca. Gerîlayan ra nêbîyêne Başûr de federalîzm zî do çin bîyêne, dewleta tirke zî do nêewnîyayêne rîyê PDKyî ra. Gerîlayî teyna hêzê raştîye, azadîye yê.

Şehîdanê ma yê fedayîyan ê çalakîya TUSAŞî embazanê ma Asya û Rojgerî peyê xo de mektubî ver dayî. Tewirê nê wird embazanê ma, seba ma nimûne yo. Înan 74 deqayan şer kerd. Mektubê embazanê ma seke manîfesto yê. Ganî ma bi xurtî bala xo bidê nê mektuban. Ma bi ruhê înan tewrê xebatanê xo bibê. Embazanê ma Asya û Rojgerî bi çalakîya xo fermanê ney dayo ma.''