Komeleya Heqanê Merdiman (ÎHD) semedê meseleya kurdan de haştîya mendîye konferansê “Rayîrê Ver bi Haştîye: Vîr û Edalet” organîze kerd. Pîya bi kesanê ke pêkewtişan de merdimê xo vînî kerdî, xeylê pawitoxê heqanê merdiman û aktîvîstê haştîye tewrê ci bîyî. Keyetê ke tewrê konferansî bîyî dereheqê waştişê edaletî de ANFyî rê qisey kerd.

Nezahate Teke ard ziwan ke ê semedê haştîye ameyî têhet û semedê haştîye têkoşîn kenê û nê vatî: "Ma waştêne ke ewro dayîkê leşker û polîsan ke domanê xo vînî kerdî, ê zî tîya bê. Nê şerî de înan zî domanê xo vînî kerdî. Ma zanê dejê ewladan senî zor o. Ma wazenê wa programê winayênî her ca de bibê. Wa her kes qala haştîye bikero. Wa hinî no şer biqedîyo.  Ma zaf dejî dîyî. Ma wazenê wa hinî çew hesran war nêkerdo, haştîye bêra. Na herre hewceyê haştîye ya. Gerek her kes semedê nê cedh bikero. Ma nêwazenê domanê ma bimirê, ma wazenê virar şirê înan ra. Yew adirbirnayîş est o gerek wird hetî zî goreyê nê têbigêrê.Haştîye gerek dihet bo. Wa pêro tepişteyî bêrê veradayene. Gerek dewlete cade nê şerî bigedîno.”

Velî Encu zî ard ziwan ke ê paştî danê prosesê çareserî û haştîye yo ke Rayber Apoyî da destpêkerdene û nê vatî: "Ma nê prosesî zaf muhîm vînenê û paştî danê ci. Ma sey keyeyanê Roboskî tim haştîye wazenê. Wa dejî merê cîyakerdene. Dej û waştişî yew ê. Her gama ke semedê haştîye yena eştene ma paştî danê ci. Gerek no porseso peyên hetê her kesî ra bêro wayîrvejîyayene. Ganê perûne deja, ma ganê xo yê tewr erjîyayeyî vînî kerdî. Wa hinî verê înan bêro girewtene. Birêz Ocalanî berpirsîyarîya tarîxîye girewte xo ser. Gerek dewlete nê fîrsetî nêremno."

Arife Kartal zî ard ziwan ke gerek dewleta tirke derheqê prosesî de gamanê pêtan bierzo û nê vatî: "Hewceyê ma perûne haştîye rê est a. Wa hinî na herre de haştîye û wayûbiratîye bibî. Ez tîya ra veng dana Birêz Erdogan û Bahçelîyî; wa wayîrê prosesê ke Birêz Ocalanî dayo destpêkerdene, vejîyê. Mi kênayêka xo vînî kerde û lajê mi zîndan de yo. Rixmê nê heme çîyan ma semedê haştîye israr kenê. Ma nêwazenê wa hinî dayîkî dejê biancê."