Serekwekîla Grûba DEM Partî Gulîstane Kiliç Koçyîgît meclîs de derheqê averşîyayîşanê rojdemî kombîyayîşê çapemenîye kerd. 

Gulîstane Kiliç Koçyîgît derheqê komîyonê ke yeno plankerdene ke bêro ronayene nê vatî: “Derheqê komîsyonê haştîye û komelkî de dawetêkê pêvînayîşî est o. Her çî ya ver ez wazena vajî ke ma pê nê dawetî zaf keyfweş bîyî. Ma keyfweş ê ke pêro partîyî ameyî dawetkerdene. Hema ke meclîsî mabên nêdayo karî, yanî hema tatîl nêkewto destpêkerdişê nê cehdkerdişî muhîm o. Ma zî derheqê komîsyonî de xebata taslakî kerd û hazirîya ma est a. Ronayîşê nê komîsyonî semedê ma muhîm o. Komîsyon do bi partîyanê sîyasîyan sînordar memano hetanê bînan ê komelî de temas rono. Eke zemînê parlamento biaçarîyo zemînê haştîye no pêro hemwelatîyan rê feyde kene. Na haştîye ma pêrun a, gerek ma wayîrê ci bivejê.

Nê rojan ke ma qala Vengdayîşê Haştîye û Komelê Demokratîkî yê Birêz Ocalanî kenê, çim û goşê ma perûne zîndanan û caardişanê hukmatî de yê. Şar paweno ke hukmat nê caardişanê xo bibedilno. Çi heyf ke Tirkîya açarîyaya zîndanî. Hinî beso, peydeeştişê tehlîyeyan rê beso, binpaykerdişê sîstematîkî yê vera tepişteyanê nêweşan rê beso. Pratîkê ke zîndanî açarnayî keyeyanê mergî înan rê beso. Heyetê Îdare û Çimdarî wa bêrê wedaritene. Bi hewayêkê sîstemakî azadîya tepişteyanê nêweşan yena astengkerdene."

Gulîstane Kiliç Koçyîgît vat Serekê Meclîsî Numan Kurtulmuşî derheqê komîsyonê ke do meclîs de bêro ronayene pêro serekwekîlê grûbe yê partîyanê sîyasîyan semedê kombîyayîşî dawet kerdî, temsîlkarê partîyan do siba şane Kurtulmuşî reyde meclîs de kombîyayîş bikerê.