25 Hezîrane serra 1950 de Koreya Vakurî dest bi hêrişê îşgalkerdişê Koreya Başûrî kerd û şer 27 Temmuz 1953 de qedîya. Yanî şerî hîrê serrî dewam kerd. Bi destpêkerdişê nê şerî Dewletê Yewbîyayeyî yê Amerîka û Çîn zî tewrê  ci bîy û no bî problêko mîyanneteweyî. 

Wextê destpêkerdişê nê şerî de Hukmatê Partîya Demokratîke Tîrkîya de îqtîdar de bîye. Semedê tehdîdanê Yewîya Sowyetan û eynî wextê cehdkerdişê seba endabîyayîşê NATOyî, bi waştişê Dewletê Yewbîyayeyî yê Amerîka, Partîya Demokratîke seba Koreya Başûrî qerarê erşawişê eskeran gêna. Destpêkerdişê şerî ra heta qedîyayîşê şerî, yanî zereyê hîrê serran de goreyê qeydanê nuştekkî kome ci 14.939 eskerî Tirkîya ra şîy û Kore de artêşa Miletê Yewbîyayeyî (MY) de wezîfe girewt. 

Mabênê nê eskeranê ke şîyê Koreya Başûrî de şer kenê de Dêrsim ra zî xeylê xortî est ê. Nînan ra yew zî lajê Hesê Çanî Xidir o. Xidir keye tek laj o û o zî nê şerî de şehîd beno. Seba Xidirî maya ci yew şîware wanena: Şîwara Xidirî.  Na şîware ewro zî zaf yena vatene û hetê şarê kirmancan ra baş yena zanayene. 

Ma do cêr ra nika na şîware bivîne.

 

ŞÎWARA XIDIRÎ

Onder Xagû vera Xidirê mi,

Cîgera mi sona raye

Dima bervena pepûga Kora maye.

Wayî wayî lemi lemi Xidirê mi

Ax de bîye bîye Xidirê mi,

Cîgera mi lemin bîye,

Daye ma rê ondera Kore îcat bîye,

Wayî wayî lemi lemi Xidirê mi

 

Ti bê meso meso biko Xido,

Gosro mine lemin ti meso,

To xapneno beno biko Xido,

No zalim hukmato teres o.

Wayî wayî lemi lemi Xidirê mi.

Onder Mamekîya Mamekîya,

Daye lemin Mamekîya

Zalimî ma dayme arê berdîme,

Di se û poncas mordem pîya,

Wayî wayî lemi lemi Xidirê mi.

 

Daye kore de puk o, xedev o,

Xidirê mi cîgerê mi, voreno,

Daye dota hen ke nanê ma ra,

Zalim mezal de ma nêdano.

Wayî wayî lemi lemi Xidirê mi

Way de bîye bîye Xidirê mi,

Cîgerê mi lemin de bîye,

Daye ma rê kaxita şîyaye vejîye,

Ti endî tesela xo mi ra bifîye

 

Paîzo velg û vas darû ra risîno,

Sevqete hevalûnê to ber bîyo,

Biko sîndorê ma û dîne çînî yo,

Wayî wayî lemi lemi Xidirê mi.

Xidirê mi, cîgerê mi amo usar o,

Ti şîya ne son o, ne sodir o mi ser o,

Wayî wayî lemi lemi Xidirê mi.

Vazo vazo Mursa lemin vazo,

Warî ser o Xidirê mi teku ju azo,

Wayî wayî lemi lemi Xidirê mi

 

Qese û qeyde: Anonîm

Arêkerdox: Saît Bakşî (Seyîdê Kalî)

Vatox: Saît Bakşî

Şeklo peyên: Saît Bakşî