Serrgêra 100ine ya îdamê Şêx Seîd û embazanê ey de şaristanê Brukselî yê Belçîka de 28-29ê hezîrane de konferansêk û şaristanê Kolnî yê Almanya de zî mîtîngêk do bêro kerdene.

Endamê Konseya Rayberdişî ya KCKyî Zubeyîr Aydaro ke Komîteya Amadekarîye de cagêno ANFyî rê qisey kerd.

Aydarî îfade kerd ke Serewedaritişê Şêx Seîdî seba ke Peymana Lozanî de şarê kurdî çin hesibîyabi dîyabi destpêkerdene. Aydarî da zanayene ke ê do konferans de çarçewa akademîke de serewedaritiş biercnê.

Aydarî vist vîrî ke serrgêra dardekerdişê Şêx Seîdî 29ê hezîrane de cezaya îdamî dîyabî Rayber Apoyî zî û vat: ‘’Dewlete mesajê ‘Ma çi ardo Şêx Seîdî ser, do bîyarê sereyê to zî.’ ‘’

Aydarî pare kerd ke konferans de mesajê ‘Ma vîr a nêkerd û do nêkerê’ bêro dayene’ û dima zî Koln de mîtîngêk bêro kerdene. Aydarî vat: ‘’Nê konferans û mîtîng bi perspektîfê neteweyîyî de ameyê amadekerdene. Serewedaritişê kurdan vîrê ma yo hempar o û erjê ma yê. Nika pêvînayîşanê bi Rayber Apoyî reyde Vakurê Kurdîstanî de prosesêk yeno caardene. La rewşa 1925î hema zî dewam kena. Pêro serewedaritişê kurdan bi dardekerdişan ameybî qedînayene. La PKKyî netîceya têkoşînê xo de dewlete arda verê masa.’’

Aydarî peynîya qiseykerdişê xo de wina vat: ‘’29ê hezîrana 2025î de, ma wazenê cewabêkî bidê kursîyanê îdamî ke 100 serrî verî Meydanê Berê Koyî yê Amedî de ameybî ronayene. No mîtîng ê partîyêke nîyo, seba yadkerdişê şehîdan o. Ma venga pêro partîyanê Kurdîstanî, dezgehan, şexsan û şarê xo danê ke 29ê hezîrane de şaristanê Kolnî de tewrê nê mîtîngî bibê.’’