Hemsereka PJAKî Peymane Vîyan roportajêk da RojNewsî û şerê Îsraîl-Îranî, tewirê kurdan û rayîrê çareserîye ercnayî.

Ercnayîşanê Peymane Vîyan ra tayê qismî wina yê:

‘’Beno ke şer Rojhelatê Mîyanênî de pîl bibo. 2010 ra nata şer bi ‘hêzanê wekîlan’ ameyêne kerdene la nika dewletî raşta raşte hêrişê yewbînan kenê. Şero ke vera Îranî yeno kerdene netîceya polîtîkayanê despotan ê Îranî yo. Şar rejîmî ra aciz bibi la rejîmî cewab nêda ney. Verê Îranî de di tercîhî nîyenê ro; şer û teslîmîyet. 

Ma wina vanê ke meseleyê şaran bi şerî nênê çareserkerdene. Rojhelatê Mîyanênî de sîstemêko demokratîk lazim o. Ganî herême de sîstemê Konfederalîzmê Demokratîkî bêro caardene. Rojhelatê Mîyanênî de xeta hîrêyîne lazim a. Tena cinîyî eşkenê na xete awan bikerê. 

Di noqtayê qelsî yê Îranî est ê; cinî û kurdî. Nê wird terefî eşkenê rejîmî serûbin bikerê. Îsraîl ho dano Îranî ro la Îran cinîyan rê vano ke ‘laçikanê xo rê mîqat vejîyê.’ Îran terseno ke serkêşîya cinîyan de ancî serewedaritiş dest pêbikero. Tersê ci yo bîn zî Kurdîstan o. Îranî muhafizê şorişî Kurdîstan de cakerdî ke verê şorişî bigêrê.

Rojhelatê Mîyanênî tek komelo ke do bieşko serkêşîyê vurîyayîşî bikero komelê kurdan o. Rojhelatê Kurdîstanî hêzêko alternartîf tena PJAK o. Her kes zaneno ke potansîyelê ma est o ke ma serkêşîye bikerê û amade yê. Heta nika Amerîka yan zî Îsraîlî seba pêvînayîşêkî muracatê ma nêkerd.

Dewleta tirke kena ke herêmanê kurd û azerîyan de nakokîyan veja. Rojhelatê Kurdîstanî de azerîyî, armenîyî, asûrîyî û kurdî têzere ciwîyenê. Dewleta tirke seba ke kurdê Rojhelatê Kurdîstanî nêbê wayîrê statuyî têgêrena. Pan-turkê Îranî zî paştî danê dewleta tirke. La şarê ma her wextî ra zafêr hişmend o. 

Ma prosesêkê tarîxî û hesasî ra derbaz benê. No proses do qederî dîyar bikero. Ganî şarê ma bizano ke xo senî bipawo. Ma seba pawitişê şarî xora amade yê. Ganî şarê ma sîstemê xo yê demokratîkî awan bikero, komunanê xo awan bikero. Seba ke no proses bi serkewtişî tacîdar bibo, ma hertim hetê şarê xo de yê.’’