Endama Konseya Rayberdişî ya KJKyî Çîgdeme Dogu ANFyî rê qisey kerd. Qiseykerdişê Çîgdeme Dogu ra qismêk wina yo:

''Deklarasyonê xopiwitişî yo ke ma menga nîsane de eşkera kerd Kurdîstan û teberê ci de bi rojdemêk afirna. Ma sey têgêrayîşî wayîrê tarîxê xopawitişî yê 32 serran ê. Ma nê tarîx û tecrubeyê muhîmî ke ciwîyenê cinîyan ê bînan de reyde parkerdişî muhîm vînenî. Nê prosesî de ke tede problemê giranî ciwîyenê, rolê ma zaf ê. Deklarasyon zaf sey waştişê ma nêbo zî bi tay hetanê xo bi rojdem û warê munaqeşe pêard. Çiqas zanistê xopawitişî aver şiro hende hêzê rêxistine û têkoşînî aver şino. Xora têna pê munaqeşe û perwerdeyî sînordarmendiş nêbeno.

Hindistan de cinîyî bi slogana“Jin Jiyan Azadi” vera qirkerdişê serê cinîyan vengê xo kerd berz. Reyna  cinîyan ê Afganistan, Amerikaya Latine, Amerîkaya Başure cinîyan ê Beluci û welatanê Rojawanî zî cinîyan vera qirkerdişê cinîyan vengê xo kerd berz û wayîrê heqanê xo vejîyayî ke no zaf muhîm û bimana yo. Ganî nê pêro bi rêxistinbîyayîşê xopawitişî bêrê tacîdarkerdene. Herêma ma de û dinya de vera cinîyan her hetî ra hêrişî zêdîyayî. Coka ganî ma lezabez rêxistinbîyayîşê xopoawitişî aver bêrê.  Eke têgêrayîşê cinîyan her ca de na babete bigîro rojdemê xo eşkenê ver hêrişan xo bipawê.

Kurdîstan de polîtîkayê qirkerdişî yê vera cinîyan zafhetin dewam kenê. Vakur, Başûr û Rojhelatê Kurdîstanî de nê qirkerdişî eşkera ciwîyenê. Rejîmê Îranî hêrişê îdamî yê vera cinîyan domneno. Bitaybetî çalakwanê serhildanê  ‘Jin Jiyan Azadî’ û cinîyê ke vera rejîmî vejîyenê cezaya îdamî dîyena înan. Badê embaze Pexşane cezaya îdamî dîyaye embaze Werîşe Muradî zî.

Hîrê leteyanê Kurdîstanî de rojane hêrişê sey cînayetê vera cinîyan, tecawuz, feqîrîye, barkerdiş, vîndîkerdiş, mûsnayîşê fûhûş û narkotîkî, ajakerdiş yenê kerdene. Bi nê hêrişan wazenê îradeyê cinîyan bifatisnê.Cayanê sey Rojawan, Şingal û Mexmûr de yê ke şorişê cinîyan bi sîstemê xoserîya demokratîke aver şiyo, destkewteyê cinîyan yenê hedefgirewtene. Çar leteyanê Kurdîstanî û teberê welatî cinîyê têkoşîn kenê û no têkoşîn erjîyaye yo. La vera qirkerdişî ganê têkoşîn bêro xurtkerdene.

Sey bapesteyê babete ez nê zî vajî YJA Star hêzêkê xopawitişî yo. No hêz vera dewleta tirke xover dano ke peyê ci hêzo sey NATOyî est o. Wina hêrişê normalî nîyê, rojane bi tonan bombayan varnenê, çekê kîmyewî, taktîk nukleer yenê şuxulnayene. Çeteyê DAÎŞî, qoricî, hêzê PDKyî  her qeyde çeteyî nê şerî de yenê şuxulnayene.  Gerîlayê YJA Starî vera nê heme hêzan bi cesaretê xurtî, bi westayîtîye şer kenê.  No semedê cinîyan ê kurdan û cinîyan ê dinya nimûneyo muazam o. Eke paşta cîyan înan ra pêt bo û ê rêxistinkerde têkoşîn bikerî çew nêeşkeno înan.

 Koordînasyonê KJKyî bi wesîleya 25ê Teşrîna Peyêne  sereyê menge de sey deklarasyonî mesajêk pare kerd ke muhîm bi. Mabênê 10ê Teşrîna Peyêne û 25ê Teşrîna Peyêne bi slogana 'Ma bi Jin Jiyan Azadî xo pawenê' prosesê kampanyayêke dîya destpêkerdene. Nê 15 rojan de muhîmo ke babete sey teşhîrkerdişê qirkerdişê cinîyan, şîdetê vera cinîyan, verê şîdetî senî gerîyeno bibê rojdem, munaqeşekerdene û gamî bêrê eştene. Qirkerdişê Wayanê Mirabelan ra heta Sarayan, Gulîstanan cinîyê şorişgêrê ke ameyî qetilkerdene ma deyndarê înan ê. Vera nê qirkerdişan û şîdetî wezîfeyê ma yo ke ma têkoşînî xurtêr bikerê. Ez veng dana heme cinîyan ke wa tewrê na kampanya bibê.''