Cinîyî çarçewa Roja Têkoşînê Vera Şîdetê Cinîyan de vejîyayî waran.

Wan de serkêşîya TJA de bi şîarê 'Zîndanan de vera tecrîd û şîdetî Jin, Jiyan, Azadî' eşkerayîyêke dîyaye. Eşkerayîye de bale ameye antene ser ke dewleta Îranî cezaya îdamî dana cinîyan û la cinîyî bi qerardarî xoverdayîşî rê dewam kenê. Çalakîye de sloganê sey "Jin, jiyan, azadî" û "Bijî berxwedana zindana" ameyî vatene.

Mersîn de cinîyan cinîyê karkerê zîretî zîyaret kerdî. Wekîla DEM Partî Perîhane Koca û endamê MEclîsê Şaredarîya Akdenîzî zî tewrê zîyaretî bîyî. Perîhane tîya de venga pêro cinîyan da ke wa vejîyê waran.

Adana de Parka Înonuyî de cinîyan standêk akerd û derheqê 25ê Teşrîna Peyêne de agahîyî dayî. Cinîyan venga her kesî da ke 25ê teşrîna peyêne de Meydanê Ugur Mumcuyî de wa tewrê rayraşîyayîşî bibê.

Erzirom de cinîyan verê bînaya DEM Partî de kargehê 'cînsîyetê komelkî' kerd û derheqê têkoşînê cinîyan de ercnayîşî kerdî.

Qezaya Rêzanî ya Amedî de cinîyan Goristanê Yenîkoyî de gorê cinîyan zîyaret kerdî. Meryeke Soylu verê gorê Fermandara YJA-Starî Hulya Eroglu (Delale Amed) de qisey kerd û vat: ''Ma zulmê vera cinîyan qebul nêkenê.''

Şirnex de cinîyan bi şîarê 'Ma heq û cuyanê xo ra fek vera nêdanê' panelêk viraşt. Sîyasetmedare Çaglar Demîrel, Hemşaredara Silopîya Jîyane Ormanli û avûkate Elîfe Tîrenç Îpek tîya de qisey kerd. Panel bi sloganan qedîya.