Dima ke cezaya zîndanî ya 6 serran û 3 mengan dîyabî Hemşaredarê Dêrsimî Cevdet Konakî verê şaredarîye de vera îxtîmalê xespkerdişî nobete dîyabî destpêkerdene. Nobete roja diyîne de dewam kena.

Hemserekê Pêroyî yê ESPyî Murat Çepnîyî, îdarekaranê DEM Partî yê Çewlîgî û xeylê kesan şaredarîye zîyaret kerde. Girseyî heta Meydanê Seyîd Rizayî rayraşîyayîş kerd û tîya de eşkerayîye daye.

Murat Çepnîyî îfade kerd ke cezaya vera Konakî darbeya vera îradeyê şaran a û vat: ''Îqtîdarê AKP-MHPyî xîret keno ke bi çimtersnayîşê şarî estbîyayîşê xo rê dewam bikero. Ma ancî Meydanê Seyîd Rizayî de qîrenê ke hayîya ma bi kayanê şima est a, xoverdayîşê ma qetî do ser bikewo. Ma venga şarî danê ke bi xoverdayîşê xo mîyanê paştdayîşî de bibê.''

Sebahate Tuncela ke şîbî Dêrsimî vat ke mehkemeyê nikayênî Mehkemeyanê Îstîklalî ra zafêr dişmenîya kurdan kenê. Sebahate vat: ''Ma vanê ke 'hinî bes o.' Ê kurdan sey hemletîyan nêvînenê. Aseno ke kurdî bi hawayêkê resmîy hemwelatîbîyayîşî ra ameyê dûrvistene.''

Sebahate Tuncel û heyetê ci dima Taxa Siyengî de esnafî zîyaret kerdî.