Hemşaredarê Dêrsimî Cevdet Konakî rê cezaya zîndanî ya 6 serran û 3 mengan dîyabî. Ceza verê şaredarîye de bi eşkerayîyêke ameye protestokerdene. Hemşaredarî Bîrsene Orhan û Konak, Hemşaredara Depe Songule Duzgun, endamê DBPyî, rêxistinê DEM Partî yê Dêrsim, Erzîngan û Xarpêtî, Wekîla DEM Partî ya Dêrsimî Aytene Kordu û xeylê kesî tewrê eşkerayîye bîyî.

Bîrsene Orhan eşkerayîye de vat ke huqûq yeno binpaykerdene û mehkemeyî qirkerdişî kenê. Bîrsene vat: ''Merasîmê cenazayan ê ke ma tewrê nînan bîyê bîyê sebebê dewayan. No darbeyêka sîyasî ya. Ma bi şewe û roje şaredarîye de nobete bikerê. Wa îqtîdar bizano ke şarê Dêrsimî qerardar o.''

Songule Duzgun îfade kerd ke îqtîdar şaredarîyan sey beranê rantî vîneno û vat: ''Ma do sereyê xo nêarê war. Destê xo şaredarîyanê ma ra biancê.''

Aytene Kordu vat: ''Na ceza vera îradeyê şarî dîyaye. La ma do sereyê xo nêarê war. Wa her kes wayîrê şaredarîyan vejîyo. Ma do tîya de bibê. Şaredarîya ma xizmetê şarê Dêrsimî rê dewam bikera.''

Hemşaredarê Pêrî yê verênî Orhan Çelebîyo ke 2019 de herinda ci de qeyûman amebî tayînkerdene zî vera ceza nêrazîbîyayîşê xo mojna û venga şarî da ke paştdayîşî xurtêr bikero.

Eşkerayîye bi çepikan qedîyaye.