Endamê Komîteya Rayberdişî ya PKKyî Duran Kalkan Medya Haber TV de tecrîdê Îmraliyî, Hemleya 15ê Tebaxe û babetê rojdemî yê bînî ercnayî.

Qiseykerdişê Kalkanî ra tay noqtayê girîngî wina yê:

''Vera tecrîdê serê Rayber Apoyî çalakî û nêrazîbîyayîşî zêdîyenê. Seba şikîyayîşê tecrîdî têkoşînêko girîng yeno kerdene. La ganî no têkoşîn bêro pîlkerdene. Dezgehê Ewropa verê tecrîdî de bêveng ê. Ancî Tirkîya de zî tay partîyê ke xo rê vanê çepgîr bêveng ê. Rayber Apoyî seba azadîya kurdan û demokratîkbîyayîşê Tirkîya têkoşîn kerd coka ewro o zîndan de yo. La êyê ke xo rê vanê demokrat verê tecrîdî de tênêgêrenê. Kurdîstan de seba azadîwazîye û Tirkîya de seba demokratîkbîyayîşî tewirê vera tecrîdî kaxidê turnosolî yo. 

Rayber Apo 26 serrî yo binê tecrîd û îşkenceyî de yo. Wa çew nêvajo ke na rewşe nêzaneno. Ganî ma nê sîstemê Îmraliyî hîna zaf teşhîr bikerê, Rayber Apoyî de hîna zaf yew bibê û azadîya Rayber Apoyî sey azadîya xo bivînê. Azadîya Rayber Apoyî demokratîkbîyayîşê Tirkîya û azadîya Kurdîstanî ya. Coka ganî têkoşînê seba azadîye û demokrasîyî têkoşînê seba azadîya Rayber Apoyî de yew bibo.

Ez serrgêra ci ya desine de qirkerdişê DAÎŞî yê vera Şingalî şermezar kena. Şingal de hema zî têkoşîn û xoverdayîşê seba estbîyayîşê êzidîyan dewam keno. Dewleta tirke, Iraq û PDK gêrenê ke Şingal de hêrişê neweyî bêrê kerdene. Şarê Şingalî nê 10 serran de destkewteyê girîngî vistî destî û ganî bi xurtî wayîrê nînan vejîyo.Nê 10 serran de DAÎŞ nêame muhakemekerdene. Tay dewletanê sey Almanya Fermanê 3yê Tebaxe sey jenosîdî pênase kerd la vera DAÎŞî dewayêke anêkerde. Ez bawer kena ke şarê Şingalî nê 10 serran de dersê holî girewtî û do goreyê nê dersan têbigêro.

Zîndanê Amedî de xoverdayoxanê 14ê Temmuze bira xoverdayîş û têkoşînî dabi. Hemleya 15ê Tebaxe na bire arde ca. Ewro ma serrgêra 40ine ya Hemleya 15ê Tebaxe de yê. Hemleya 15ê Tebaxe netîxeya kedanê des serran ê Rayber Apoyî de ameye caardene. Rayber Apoyî seba 15ê Tebaxe vatbi 'Hemleya merdimbîyayîşî de israr.' Afernayoxê na hemle Rayber Apoyî yo la ciwan û cinîyanê kurdan bi fedakarî û cesaretê xo na hemle aver berde.

Hemleya 15ê Tebaxe vera înkar û tasfîyeya kurdan amebî îlankerdene. Hema zî kurdî yenê înkarkerdene û binê gefê çinkerdişî de yê. Naye ra Hemleya 15ê Tebaxe 40 serrî yo dewam kena. Hemleya 15ê Tebaxe mîladê gandarbîyayîşê kurdan o. Hinî çew nêeşkeno kurdan bero 40 serrî verî. Tecrubeyê Hemleya 15ê Tebaxe xazîneya tewr pîl a. Nê 40 serran de kurdî bîyî wayîrê feraset, rêxistinîye û destkewteyan. Nê 40 serran de Kurdîstan de xeta Apogîre aver şîye û bîye zixm.

Nika şerê gerîlayan dewam keno. HPGyî bîlançoya temmuze eşkera kerda. Serrgêra Hemleya 15ê Tebaxe de şerê gerîlayan aver şino, ser keweno. Gerîlayî her roje danê dişmenî ro, helîkopteran û droneyanê dişmenî visnenê warî û îşxalkeran ceza kenê.

Ma êlula 2002yî de dabî eşnawitene ke Herêmê Pawitişî yê Medya herêmê xelisnaye yê û kam hêrişê nînan bikero ma zî do hêrişê ci bikerê. No prensîbê ma derbazdar o. 3yê temmuze ra nata hêrişê dewlete vera Başûrî zêdîyayî. PDK zî nê hêrişan de raşta raşte kişta dewleta îşxalkere de cagêno. PDKyî erdê Başûrî pêşkêşê îşxalkeran kerdo. PDK zûran keno, tim PKKyî keno sûcdar. O çax wa qiseyanê xo îsbat bikero. Gerîlayî qetî zerar nêdanê şarê Başûrî. PKK vera îşxalkeran û xayînan şer keno. Wa şarê ma yê welatperwerî vera nê kesan erkanê xo bîyaro ca.

Îqtîdarê AKP-MHPyî hêrişê kultur û ziwanê kurdan keno, ciwanan govende û deyîranê kurdkî ra tepişeno. Xora dewleta tirke 100 serrî yo verê estbîyayîşê kurdan de wina têgêrena. AKP zî 20 serrî yo heman çî keno. La çewî bi raştî kerdişê AKPyî nêdîyêne. Yanî tîya de yew xeflet est o. Îqtîdarê AKP-MHPyî yo faşîst tim hêrişê kurdan keno. Coka wa her kes xefletî ra xo bixelisno. Faşîzm ancax bi xoverdayîş û têkoşînêkê aktîf û radîkalî eşkeno bêro rijnayene. Coka ganî ma bi nê hawayî xo ver bidê. Ganî bi taybetî ciwanî wa hişyar, hayîdar û rêxistinkerde bibê. Ganî ciwanî bibê radîkal. Ciwanî wa nê sîstemê faşîstî ra xo bixelisnê. 

Erdoganî şerê Gazze har kerd. Erdoganî Hamas dekerd mîyanê şerî. La nika seba peymana adirbinayîşî ver gêreno. Ancî Erdogan û îqtîdarê ci xîret kerdêne ke mabênê Îsraîl û Îranî de şer vejo. Serekê Hamasî Tehranî ra zafêr ameyêne Tirkîya. La o Îran de kişîya. Çunke amadekarîya şerê Îran-Îsraîlî yena kerdene. Rejîmê AKP-MHPyî bi nê polîtîkayanê xo Tirkîya dekerde mîyanê krîzan. Ma sey têgêrayîşî dûştê şeranê neweyan ê. Nê şerî şerê emperyal ê. Ganî Îran Erdogan û Îsraîlî ra tehrîk mebo.

Dewleta Îranî di embazanê ma yê cinîyan rê cezaya îdamî daya. Rejîmê Îranî destpêkî ra nata bîlasebeb verê Serewedaritişê Jin, Jiyan, Azadî de vindert. Îdamî, tepiştişî, îşkenceyî û tedayî nêeşkenê meseleyan çareser bikerê û serê waştişanê şarî bigêrê. Ma sey Têgêrayîşê Azadîye tim hetê cinîyanê Îran û Rojhelatê Kurdîstanî de yê. Ma hêvî kenê ke hukmatê Îranî yo newe do goş bido waştişanê cinîyan.''