Hemserekîya Konseya Rayberdişî ya KCKyî  bi wesîleya serrgêra Qirkerdişê Sêwasî eşkerayîya nuştekîye daye û nê vatî:

''Qirerdişê Sêwasî yo ke bi hersê pîlî û dejî vîrê ma de yo, 32 serrî xo dima verdayî. No qirkerdişo ke bi destê hêzanê faşîstan ame kerdene ma reyna şermezar kenê, kesanê ke qirkerdiş de dinyaya xo bedilnaye ma înan bi hurmet yad kenê. Qirkerdişê Sêwasî qirkerdişanê tewr giranan ê tarîxî ra yew o. Zafê înan nuştoxî, hunermned, rojnameger û roşnvîrê ke semedê aktîvîtîyêka Otêla Madimakî de mendêne dîyayî adirî ver û ameyî qetilkerdene. Zafê înan hema ciwanî bî. Nê qirkerdişê wehşîyî hem bi waştişê xo hem zî bi tewirê kerdişî vîrê komelê elewîyan, şaranê Kurdîstan û Tirkîya de birîna xorîn akerd û rêçe verda.

Qirkerdişê Sêwasî yo ke sey Qirkerdişê Çorum û Mereşî vera komelê elewîyan ame kerdene, vera roşnvîranê şorişgêr û demokratîkan ê komelê Tirkîya zî ame kerdene. Bi nê qirkerdişî yo ke hetê zîhnîyetê yewperest,kanperest,netew-dewlete ra ame kerdene ame waştene ke ameyoxo demokratîk ê şaran bêro tarîkerdene, komelî yewbînî rê bido şiknayene,biverdo pê û teslîm bêro girewtene. Pêro qirkerdişanê vera komalê elewîyan de no eşkera yeno vînayene. Tim provokatorî, hêzê paramîlîterî kewnê dewre, bi destê înan mezhebî verdîyenî pê û dima ra warê hêriş û qirkerdişan yeno afirnayene. Pawitişê kiştoxan rolê dewlete yê qirkerdişan eşkera vejeno werte. Eynî çî Qirkerdişê Sêwasî de zî bi. Kesanê ke qirkerdiş kerd bi serran ameyî pawitene û tewr peynî de ameyî rîsipîkerdene.

Nizdîbîyayîşê dewlete yê vera kurdan û elewîyan seycîye yo. Senî ke kurdî pîya bi prosesê komare ameyî înkarkerdene, raştê qirkerdişan ameyî ame waştene ke bêrê çînkerdene, elewî zî ameyî înkarkerdene, rîyê bawerî û kulturê xo ra raştê zextî ameyî, vera înan qirkerdişî ameyî kerdene. Eynî çî vera şaran û kulturanê bînan zî bi. Şarê kurdî seba ke na raştîye zaf xorîn ciwîya sere de elewîyî paştî dano pêro şaran ke raştê qirkerdişan ameyî. Rayîrê nê tarîxê qirkerdişî ra xelisîyayîşî, qedînayîşê zîhnîyetê netewe dewleta yewperest o. No zî bi demokratîkbîyayîşê komare mumkun o.

''Vengdayîşê Haştîye û Komelê Demokratîkî'' yê Rayber Apoyî zî nê hedef keno. Bi nê vengdayîşî yeno waştene ke tarîxê qirkerdişan ra bêro xelisnayene û seba ke şarî tede pîya sey wayûbirayî biciwîyê, cuyeyêka demokratîke bêro înşakerdene. Ma zî pê bawer ê ke cuya azade ya demokratîke ya ke şar ci rê hesret o, bi nê rayîrî mumkun a. Bi caardişê nê waştişî ma eşkenê cewabê qirkerdişanê vera şaran bidê. Bi nê hîsan û bawerîye ma reyna kesanê ke Qikerdişê Sêwasî de dinyaya xo bedilnaye bi hurmet yad kenê.''