Kitab de tarîxê Tevgerê Azadîya Kurdîstanî girîyeno dest û "Welatê Tîje de Ganîbîyayîş" kitabo verên o. Bi cigêrayîşêko xorîn û emego gird kitabo verên qedîya. Romanê Welatê Tîje de Ganîbîyayîş hetê Ocalanî ra pêşnîyaz bibi û 7 nuştoxî ser o xebitîyayî. Kitabê Amara 4 serran de ameyo amade kerdene û 8ê êlule de kitabroşanê Ewropa de cayê xo guret.

'OCALANÎ WAŞT KE ROMANÊ TEKOŞÎNÊ KURDAN BÊRO NUŞTENE‘

Nuştoxê romanî M.Saît Uçlu derheqê kitabî de nêyî vatî: "Rayberê Şarê Kurdî Abdullah Ocalanî yew dîyayîşê xo de waştbi ke bi nameyê 'Klanê Apoyî' de romanêk bêro nuştene. No proje biney kewt erey la peynî de Mektebê Edebîyatî yê Şehîd Şîlane pêşnîyaza Rayberîye ra 10 serrî ra dima 2014 de dest pêkerd. Rayber Apoyî waşt ke wa Tekoşînê Azadîya Kurdan bibo roman. Romanê "Welatê Tîje de Ganîbîyayîş" de na babete girîyena dest. Kitabo verên bi nameyê Amara hîrê cîldî yî. Ê bînî zî têdima yenê.

‘CIGERAYÎŞÊ HEQÎQATE Û AZADIYE YÊ KURDAN‘

Uçluyî dewamê qiseykerdişê xo de wina vato: “Amara her çî ra ver romanêko kurdan a. Cigêrerayîşê heqîqate û azadîye yê kurdan ser o ameyo nuştene. Amara eynî wext de kurd, tirk, treb, armenî, suryanî-keldanî, cihûd, rûm û heme komelê ke na cografya de pîya cuyenê, romanê hemînan a. Şexsê keyeyê Ocalanî de ewil kurdî û pêroyê şarê bînî ke pîya cuyayî, hîkayeya înan ya ortaxe ya.”