Koma Haştîye û Komelê Demokratîkî Silêmanî de eşkerayîya xo daye. Eşkerayîye wina ya:

‘’Şarê ma û rayaumûmîye rê;

Sey Koma Haştîye û Komelê Demokratîkî ya ke seba bihêzkerdişê prosesê vurîyayîş û vurnayîşê demokratîkî ronîyaya, ma merdimanê ke tîya de yê û her keso ke beno şahîdê çalakîya ma ya demokratîke ya tarîxîye selam kenê.

Ma şerwanê azadîye yê cinî û camêrd ê ke seba ke vera înkar û îmhaya estbîyayîşê kurdan şer bikerê tarîxanê cîyayan de tewrê PKKyî bîyê, çekî girewtê û têkoşîn kerdo. Ewro ma seba ke cewab bidê vengdayîşê Rayberê Şarê Kurdî Abdullah Ocalanî yê 29ê hezîrane tîya de yê. Ancî ma bingeyê Vengdayîşê Haştîye û Komelê Demokratîkî yê Rayber Abdullah Ocalanî yê 27ê sibata 2025î û Kongreya 12ine ya PKKyî de zî tîya de yê. Seba ke nîyetê holî û qerardarîya serkewtişê prosesê Haştîye û Komelê Demokratîkî bimojnê û seba ke naye ra pey têkoşînê xo yê azadîye, demokrasî û sosyalîzmî bi metodanê sîyasetê demokratîkî û huqûqî bikerê û bingeyê vetişê qanûnanê entegrasyonî de ma bi îradeyê xo yê azadî çekanê xo îmha kenê.

Na gama ma sere de cinî û ciwanan rê pêro şarê ma rê, şaranê Tirkîya û Rojhelatê Mîyanênî rê û pêro merdimatîye rê bixêr ba û biba wesîleya haştîye û azadîye.

Ma zerrî ra destek danê îfadeyê Rayber Apoyî ‘Ez bi hêzê çekan ney bi hêzê haştîya komelkîye û sîyasetî bawer a û venga şima dana ke nê krîterî bîyarê ca.’ Ma sereberz ê ke nê krîterê tarîxî anê ca.

Ma zanenê ke heta nika qet yew çi asan, bêbedel û bêtêkoşîn nêbîyo; eksê ci her çi bedelanê pîlan û bi têkoşînê gonîye ame destvistene. Xora naye ra pey zî têkoşînêko çetin do bêro kerdene. Ma na raştîye hol zanenê. Seba ke destkewteyanê demokratîkan û serkewtişanê neweyan bivisnê destî ma bi fikr û paradîgmaya Rayber Apoyî zerrî ra bawer ê û ma sey embazan bi hêzê xo yê kolektîfî zî bawer ê.

Nê wextî de ke dinya de zexto faşîst zêdîyayo, herêma ma Rojhelatê Mîyanênî de açarîyaya gola gonî û şarê ma her wextî ra zafêr hewcedarê mîyanê haştîye de cuyeya seyyewbîne û demokratîke biciwiyo, ma muhîmîya girde ya na gama tarîxî, raştîya ci û teqizeyê ci vînenî û hîs kenê.

Ma hevî kenê ke her kes, cinî û ciwanî, karker û kedkarî, hêzê sosyalîst û demokratîkî, pêro şarî û merdimîye erjê gama haştîye û demokrasîyî ke ma erzenê vînenê, fam kenê û teqdîr kenê.

Na çarçewe de ma veng danê pêro hêzanê herêmî û globalî ke berpirsîyarê dejanê şarê ma yê, wa heqanê neteweyîyan ê meşrû û demokratîk ê şarê ma rê hurmet bikerê, paştî bidê prosesê haştîye û komelê demokratîkî.

Sere de cinî û ciwanî, karker, kerdkarî  ma veng danê pêro şaran, hêzanê sosyalîst û demokratîkan, roşnvîr, nuştox, akademîsyen, huqûqnas, hunermend û sîyasetmedaran ke wa na gama tarîxî raşt fam bikerê, paştî bidê ma, şarê ma. Reyna ma veng danê ke wa semedê azadîya Rayber Apoyî û çareserkedişê meseleya kurdan aktîf têkoşîn bikerê, têkoşînê sosyalîstî yê enternasyonalî û paştdayîşî xurt bikerê.

Ma veng danê şarê xo û pêro hêzanê sîyasîyan ke wa nê prosesê tarîxî bitaybetî zî prosesê Haştîye û Komelê Demokratîkî yo ke Rayber Apoyî aver berd, raşt fam bikerê, her warî de her hetî ra wezîfeyê xo bîyarî ca, cuyeya demokratîke aver bêrê.

 Zulum do bigedîyo, azadîye û paştdayîş do ser bikewê. Prosesê Haştîye û Komelê Demokratîkî do miheqeq ser bikewo.

11ê Temmuza 2025î

Koma Haştîye û Komelê Demokratîkî”