Rewşa weşîye ya tepişteyê nêweşî Hayatî Kaytanî giranêr bena. Hayatî Kaytan 23 serrî yo zîndan de tepişîyeno. Îdareyê zîndanî rixmê muracatan zî nêverdeno ke Kaytan bêro tedawîkerdene.

Avûkatê Kaytanî Alîşan Yildizî ard ziwan ke engiştê dest û linganê Kaytanî nêeşkenê bi qîmî têbigêrê û vat: ‘’Ma çend reyî îdareyê zîndanî de pêvînayîş kerd, muracat kerd. Muracat de ma pare kerd ke ganî muwekîlê ma bêro amelîyatkerdene, sewqê nêweşxaneyî bibê û mesrefî zî hetê ma ra bêrê dayene. Ma waşt ke o sewqê Zîndanê Îzmîrî yan zî ê Antalya bibo. 

Mudirîya Pêroyîye hêverî bire daye ke wa cigêrayîş bêro kerdene ke Bolu de nêweşxaneyêkê goreyê tedawî est o yan ney. Goreyê min mudirê Zîndanê Boluyî bê ke Hayatî sewqê nêweşxaneyî bikero raporo verên newe kerd. Rapor de amelîyat ser o qiseyêk zî çin o. Amelîyatê Kaytanî qestî ra nêno kerdene.’’

Yildizî da zanayene ke Mehkemeya Heqanê Merdiman a Ewropa bire dabî ke heqê hêvîye yê Kaytanî ameyo binpaykerdene. Yildizî vat: ‘’Birêz Abdullah Ocalan, Gurban û Boltanî reyde na mehkeme bire dabî ke heqê înan ê hêvîye ameyo binpaykerdene. Pêvînayîşanê haştîye reyde ganî tecrîdê vera Ocalanî wedarîyo, tepişteyê nêweşî vera bidîyê. Ez naye zî vajê ke tehlîyeyê tepişteyanê nêweşan hetê Heyetanê Çimdarîye û Îdareyî ra yenê astengkerdene.’’