Merkezê Cigêrayîşê Warê Sosyo-Polîtîkî (SAMER) mabênê 22 û 26ê adara 2025î de derheqê Vengdayîşê Haştîye û Komelê Demokratîkî yê Rayber Apoyî de cigêrayîş kerd. Koordînatora SAMERî Yuksele Genç derheqê cigêrayîşî de ANFyî rê qisey kerd.

Yuksele da zanayene ke vengdayîşê Rayber Apoyî ra dima mîyanê komelî de hêvîya haştîye virazîyaya. Yuksele ard ziwan ke seba averşîyayîşê prosesî vengdayîş qîm nêkeno ganî dewlete zî gaman bierza. Yuksele vat: ‘’Seba ke îqtîdar game nêerzeno qesawet virazîyeno. Waran de se ra 60ê merdimî eşkerayîya Ocalanî sey pozîtîfî vînenê la beşêko giran qerqilîyeno. Şar hêvîdar o la şikdar o zî.’’

Yuksele pare kerd ke mîyanê waştişanê komelî de êyê tewr giranî nê yê: ‘’Wa efûya pêroyîye vejîya, ziwanê haştîye bişuxilîyo, Birêz Ocalan mîyanê prosesî de raşta raşte cabigêro û heqê hêvîye ra îstîfade bikero, tepişteyê nêweşî vera bidîyê û proses bi qanûnî bêro garantîkerdene. Nê waştişî dewlete rê yenê kerdene. Xîretê haştîye tena bi yew terefî nêbenê. Verê haştîye de astengîya tewr pîle ferasetê dewlete yo neteweperwer o.’’

Yuksele îfade kerd ke ganî azadîya Rayber Apoyî bêra caardene û ‘’heqê hêvîye’’ rojdem de bibo. Yuksele vat: ‘’Tirkîya de azadîya rêxistinbîyayîşî û xoîfadekerdiş kêm ê. Mîyanê nê şert û mercan de zehmet o ke merdim bi eşkera qalê haştîye bikero.’’