Qezaya Sûrî ya Amedî de kar û hunerê sifirkarîya ke kultur û hunerê armanîyan o, sey xeylêk huneran beno bêqîmet. Bazarê sifirkarîye de hînî veng û vaj çin o. Hosteyê sifirkarîye Yaşar Bozkurt (47) wexto ke 9 serre bi, dest pê karî kerd û 38 serrî yo ke bêmabênbi sebr û qerardarî hunerê xo dano dewamkerdene.

Bozkurtî ard ziwan ke sifirkarîye hunero qedîm ê armanîyan o û vat: ''La kurdan zî no huner kerd. Wextêk nê bazarî de xeylêk hostayê sifirkarîye yê armenî û kurdî estbî. Vengê çakûçan bazar kerdêne pirr. Ez 38 serrî yo ke nê karî kena. Vengê çakûçî seba mi sey vengê deyîran o. Heta ke ez weş biba ez nê hunerî dana dewamkerdene. Babîyê mi ez erşawita hetê hostayêkî. Ez wexto ke 15 serre bîya dibistan war verda. Ez poşman nîya. Eke ez reyna biameyêne dinya ez do bibîyêne hostayê sifirkarîye.''

Bozkurtî ard ziwan ke xeylêk beşê sifirkarîye estê û wina dewam kerd: ''Beşê mi xemilnayîş û neqişnayîş o. Verî no kar bi qîmet û ercîyaye bi. La heyf ke her ke şino no huner beno vîndî. Sifir pakî û bisihet o. Firaqanê bînan ra nêweşîye virazîyena. Ez wazena nê karî bimusna ciwanan. Wa ciwanî wayîrê nê hunerê babî û pîrikanê xo vejîyê.''