Îqtîdarê AKPyî yo ke tim qale de est o la pratîk de çîn o tewr zaf xo pê viraştişê rayîran wasifneno la Çewlîg de rayîrê çal û rijanye yê. Çapemenîya herême bale ante rewşa rayîran ser ke bêro çareserkerdene.

Şaredarîya Çewlîgî semedê rayîran yew pêşê peran rişnayo la rayîrê bajar şikteyî û çalan ra wesayîtî nêeşkenê biramîyê.

Îqtîdar îhaleyanê rayîrî dano paşgêranê xo û ê zî sey xapînayîşî rayîran virazenê. Rayîrî seba ke zixm nêvirazîyenê û waxtê viraştişî de nînê kontrolkerdene demê kilmî de agêrenê halê xo yê verênî. Şaredarî semedê xizmetê şar û bajarî nê semedê zengînkerdişê paştgêranê xo gurîyena.

Çewlîg de sere de mehleya afatûnî xeylêk cayan de rayîrê qîrkerdeyî bîyî çal û rijîyayî. Wesayîtê nê rayîran de nêeşke biramîyê. Hetê bînî ra qapabê kanalîzasyonî zî tehluke yê. Seba ke nê qapaxî goreyê rayîrê qîrkerdeyî nêvîrazîyayî çalî virazîyayî. Şar wazeno wa rayîrî bêrê viraştene û qapaxê kanalîzasyonî zî raşt bêrê cakerdene.

Xora şarê Çewlîgî xerîbê nê çîyan nîyo. Şîrketê Ziverî yo pê nêzdîbîyayîşê xo yê AKPyî yeno naskerdene îhaleyê rayîrê Çewlîg-Sîrin-Xoşkar girewtbi ke mîktarê ci zaf berz bi û bajar de bibi rojdem. Rayîr virazîya bi temam la hema ke nêameyo akerdene rijîyabi. Seba ke zixm nêame viraştene Sîrin de rayîr qelişîyabi.