Çewlîg de siba do buroyê weçînitişî yê HDP'yî bêro akerdene

Namzedê HDP’yî yê Çewlîgî Senem Çakase û Hişyar Ozsoy vizêr şîyî zîyaretê Baroyê Çewlîgî û Cemîyetê Rojnamegeran ê Çewlîgî. Siba zî bi tewrbîyayîşê Sezaî Temellîyî do Çewlîg de buroyê weçînitişî bêro akerdene.

Namzedê hemserekîye yê Şaredarîya Çewlîgî Senem Çakase û Hişyar Ozsoy, parlamenter Erdal Aydemîr û endamê meclîsê bajarî, şîyî zîyaretê Baroyê Çewlîgî û Cemîyetê Rojnamegeran ê Çewlîgî.

Ozsoyî zîyaretê Baroyê Çewlîgî de wina qisey kerd: ”Xoserîya mahkemeyan, seba yew welatî krîtero bingehên o. Tirkîya derheqê heqanê merdiman de, peynîya lîsteye de ca gêna û mehkemeyî binê tesîrê sîyasetî de yê. ”Serekê Baroyê Çewlîgî Hanîfî Bûdancamanakî zî wina va: ”123 endamê Baroyê Çewlîgî estê û ma weçînayîşê 31’ê Adare seba ke adîlane û hiqûqî bêrê kerdene teqîb bikerê.”

Heyet peyê cû şî zîyaretê Cemîyetê Rojnamegeranê Çewlîgî û serekê Cemîyetî Yûnûs Bûdak û endamanê cemîyetî de pêvînayîşî kerdî. Bûdakî wina qisey kerd: ”Bi krîzê ekonomîyî kaxize zaf bîya biha û na rewşe seba çapemenîya herêmîye barêko giran o û çapemenîya herêmîye  do mabên ra wedarîyo. Girewtişê SEKA’yî xetayêka zaf pîle bîye. Rewşe her ke şona bena xirabe. Zamê ke kaxize rê ameyê kerdene, çapemenîya herêmîye qedênaya. Girewtişê SEKA’yî xetayêka pîle bîye. 12’ê Êlûle de zî hende zor û tedayî çin bî.”

Namzedê Şaredarîya Çewlîgî Hişyar Ozsoyî zî ard vîrî ke 200 rojnamegerî hepisxaneyan de yê û wina dewam kerd: “Tirkîya lîsteya welatê ke hetê azadîya çapemenîye û xoîfadekerdişî de avêr şîyê de rêza tewr peyî de ca gêna. Azadîya çapemenîye sey eyne ya û azadîya ê welatî musnena. Yew welat de ke çapemenîye azade bo, o welat de demokrasî ra yeno qalkerdene.”

Hete bînî ra siba zî bi tewrbîyayîşê Sezaî Temellîyî do buroyê weçînitişî bêro akerdene.