Şaristananê Kurdîstanî de zulmê DEDAŞî nêqedîyeno. Awa dewanê Zîlan, Selîvê, Kanîkê, Malê Gir, Hiskutê, Holî yê bajarekê Kanîyahe yê qezaya Hezoyî yê Êlihî 15 rojî yo faturayan ra birîyaye. Bi hezaran kesî neçare manenê ke pê traktor û wesayîtan Çemê Êlihî ra û qanalan ra awe bîyarê. Yeno vatene ke awa nê cayan zî çew keno nêweş.

Dewijî vanê heta ke DEDAŞ nêame herême faturaya ceyranî zî nêameye birnayene. Goreyê agahîya SMSyo ke dezgehî ra yeno têna deynê dewa Zîlane 2 mîlyon û 400 hezar TL yo.

Muxtarê dewa Zîlane Mehmet Demîrî ANFyî rê qisey kerd û ard ziwan ke xeta awe ya dewe hetê Îdareyê Tayberî yê Şaristanî ra virazîyaye û aye ra nat fatura nêameye birnayene. Labelê bi taybetkerdişê DEDAŞî fatura birîyaye û no deyn vejîya werte. Demîrî da zanayene ke înan qeymeqamî reyde qisey kerd, qeymeqamî vat 'Ez nêeşkena çîyêkî bikera.'

Dewa Hiskutî ra Veysî Aydin wina qala rewşe kerde: ''Serra 1994î de wexto ke awe dîyaye dewa ma ama vatene ke ma rê qetî faturaya abonetîye nêra. Wextê DYP, DSP, ANAP, Refah û wextê destpêkî yê AKPyî kesî ma rê fatura nêwaşte. 2 serrî ypo DEDAŞ ma rê wina keno. Deynê dewa ma zî 710 hezar TL yo, ê dewa Selîvî 2 mîlyon û 600 hezar o. doman û kokimê ma pêrîşan bîyî. Qeymeqamî zî ma rê vat o nêeşkeno çîyêk biker. Jan esto la rewşa ma xemê çewî de nîyo.''

Muxabîrê Ajansê Mezopotamya Bîlal Guldemo ke dewa Zîlane ra yo wina vat: ''Dadî û babîyê mi kokim ê û tede xeylêk nêweşîyî estê. Semedo ke awe çin a zehmetîye ancenê. Awa Çemê ÊLihî pakî nîya. Dewe de nêzdîyê 300 keyeyî estê. Nêzdîyê 2 hewte yo merdimî bêaw ê. DEDAŞ şaristan û dewanê Kurdîstanî de bi dezgehêko zorbaz. Rewşa dewijan xemê dewlete û dEDAŞî de nîya. Çend rojî yo ez na mesele ser o nusena la DEDAŞ hema zî bêveng o.

Na germîye de merdimî bêaw ê. No metodêkê cezakerdişî yo. Dewijî eşkenê kom bibê û nêrazîbîyayîşê xo bimojnê. Partîyê muxalefetî pê heyetan ameyî dewan la no qîm nêkeno. Ganî partîyê muxalefetî û rêxistinê komelê sivîlî dewijan têna meverdê. Ganî rayberîya ci bikere û wayîrê dewijan vejîyê.''