Înîsîyatîfê Şarî yê Kurdistanî seba erdlerzê Mereşî eşkerayîye vila kerde.  Eşkarîyîye de ame vîrardene ke seba erdlerzî Vakur û Rojawanê Kurdistanî, Tirkîya û Sûrîye de tewr tay 2 hezar û 500 kesan dinyaya xo bedilnaye, tewr tay 13 hezar û 293 kesî zî birîndar bîyî. 

Înîsîyatîfî da zanayene ke hema zî bi hezaran însanî binê xirbanê awanîyan de mendî û vat, ‘‘Bi mîlyonan şarê Kurdistanî seba lerzîyayîşê banan û rîskê erdlerzêkê neweyî şewe bêçare teber ra mendî.

Eşkerayîye ame dîyarkerdene ke nê şert û mercê zehmetî yê zimistanî de zî serdestîya AKP-MHPyî ya faşîste hewl dana ke şarê kurdî ra heyf bigîra û ame vatene, ‘‘Bajarê ke bi hezaran awayîyî xira bîyî, tena çend tîmê AFADî ameyî erşawitene û bi raya nê tîman propaganda kerde. Serdestîya AKP-MHPyî ya faşîste propaganda ra vêşêr nê bajan rê çîyêk nêkerda.’’

Înîsîyatîfî dîyar kerd ke serdestîya faşîste ya AKP-MHPyî bi polîs û eskeranê xo û bi heme rêxistinanê xo seba astengkerdişê kampanyayê paştîdayîşî yê kurdistanijan û yê rêxistinanê komelîyan xo seferber kerdî û vajîya, ‘‘Hetkarîya ke şar bi xo zerrîwazîya xo seba mexdûran erşawena, qedexe kena û vera înan dana AFADî. Erdlerzî ra 24 saetî vîyartî la na rêxistine hema hetkarîyêka şenike zî nêresnaya herêmanê erdlerzî û merdimanê mexdûran.

Mereş, Dîlokî Riha, Semsûr Meletî û cayê bînî yê Kurdistanî paweyê hetkarîya ma yê. Ma qet astengî û qedexeyêkê rejîmê faşîstî nas nêkenê. Seba ke ma bieşkîyê hetkarî biresnê şarê xo, çi hewce bikero ma do bikerê. Bi paştîdayîşî ma do birînanê şarê xo bipêşê.’’

Peynîya eşkerayîye de wina ame vatene: ‘‘Roje roja xurtkerdişê paştîdayîşî yo, roja hewanayîşê estenganê faşîzmî yo, roja xoresnayîşê Mereş, Dîlokî Riha, Semsûr, Meletî, Amed û Hatayî yo. Gere şarê ma bi ruhê seferberîye bi madî û manewî hetkarîya şarê ma yê mexdûran bikero.’’