Înîsîyatîfê Kurdîstanî Bipawê (Defend Kurdîstan) Başûrê Kurdîstanî de semedê vergirewtişê îşxalê dewleta tirke û averberdişê dîyalogê mabênê hêzanê kurdan zîyaretanê xo rê dewam keno.

Heyetê mîyanneteweyî  Têgêrayîşê Azadî zîyaret kerd û derheqê hêrişê îşxalî de qisey kerd. Endama heyetî Niko Vogel pêvînayîş de vat: Ma paştî danê şarê kurdî û semedê hetkarîya kurdan, vergirewtişê îşxalê dewleta tirke û averberdişê dîyalogê mabênê hêzanê kurdan ameyî.

Hemserekê Têgêrayîşê Azadî Mihemed Abdullahî zî keyfweşîya xo ya semedê zîyaretî ard ziwan û vat ê semedê astenkerdişê Hewlêrî qehrîyayî. Abdullahî ard ziwan ke ê bi serran o têkoşîn kenê û xeyrê Rayberê Şarê Kurdî Abdullah Ocalanî destkewteyî fînayî dest.

Hemsereke Tara Hisên zî ard ziwan ke şarê kurdî hewceyê paştdayîşê şaranê Ewropa yo û vat: ''Çunke dewletî goreyê karanê xo têgêrenê la şarî yewbînan pawenê.''

Heyetê Defend Kurdîstanî dima ra Partîya Komînîst a Kurdîstanî zîyaret kerde. Badê pêvînayîşî Niko Vogel vat înan derheqê rewşa peyên a Kurdîstanî û hêrişê îşxalî yê dewleta tirke de qisey kerd ke mabênê înan de zaf nuqtayê hemparî estê.

Berpirsîyarê Komîteya Partîya Komînîste  ya Silêmanî Osman Zîndanî vat: ''Zîyaretê nê heyetî vera îşxalî yo. No paştdayîşê heqanê meşruyan ê kurdan zaf erjyaye yo.''

Heyetî bado zî Walîyê Silêmanî Heval Ebubekîr zîyaret kerd. Ebubekîrî ard ziwan ke heyet xebata bimbareke keno û vat ê zî do paştî bidê ci.  Ebubekîrî vera hêrişê îşxalî yê dewleta tirke nêrazîbîyayîş ramojna û vat: ''Silêmanî tim paytextê haştîye yo. Ma vera îşxalê vera Kurdîstanî yê.''