Huqûqnas û Hemserekê MAF-DADî Mahmut Şakarî derheqê qedexeyê vera PKKyî yê Almanya de ANFyî rê qisey kerd.

Şakarî ard ziwan ke Almanya stratejîya sîyasîye ra qedexeyî ana ca. Şakarî bale ante rewşa xosere ya Almanya ser û vat: ''Almanya labaratuwarê krîmînalîzasyonî yê Ewropa ya. Çunke têkilîyê Tirkîya û Almanya yê tarîxî sey sebebê polîtîkî yenê mojnayene. Hetê bînî ra Almanya de kurdî û rêxistinê înan zaf ê.

1993 de Wezîrîya Karanê Zereyî ya Almanya PKK qedexe kerd. La mesele PKK nîya. Almanya komelê kurdan xo rê sey meseleyêke vînena. 1993 de vera kurdan hêrişê kontrayan est bîyê. Almanya zî seba ke nê hêrişî nêrê eşnawitene, Tirkîya de hemkarîye kerde û PKK qedexe kerd. Bi nê hawayî kurdî zî krîmînalîze kerdî. Xora Kurdîstanî ra pey tewr zaf Almanya de kurdî raştê hêriş û tedayan yenê.''

Şakarî îfade kerd ke hetê bînî ra rixmê qedexeyî zî Almanya de kapasîteya komelê kurdan ê demokratîkî, rêxistinîyê kurdan û çalakîyê kurdan tim zêdîyayê. Şakarî vat: ''Kurdî Almanya nasnameyê xo de israr kenê. Komelê kurdan ê Almanya tim xo ver dano.''

Şakarî ard ziwan ke wedarîyayîşê qedexeyê vera PKKyî pabesteyê rewşa sîyasî yo û vat: ''Hetê huqûqî ra muracatê ma est ê ke wa qedexe wedarîyo û PKK lîsteya terorî ra bêro vetene. Tîya de noqtaya girînge na ya; netîce ra zêdeyêr ma prosesî girîng vînenê. Ma na lîste qebul nêkenê, red kenê. Ma qalê terorîzmî qebul nêkenê. Na mesele polîtîk a, tarîxî û sîyasî ya.''