Cayê tewr feqîrî bajarê Kurdîstanî yê sey Wan, Colemêrg, Idir, Agirî, Qers, Erdexan, Bedlîs û Mûş ê. Nê bajarê ke nufusê ci yo ciwanî zaf o de se ra 85 ciwanî bêkar ê. Bajarê Kurdîstanî yê ke îmkanê kar û berardişî çîn ê, bi hezaran merdimî seba ke kar vînê mebur manenê bar kenê şinê bajaranê rojawanê Tirkîya. Bitaybetî ciwanê ke sektorê înşaat û zîretî de şinê metropolan zafê înan ya cînayêtê karî de ya hêrişê nîjadperestî de yenê mirênayene.

Goreyê donayene TUÎKî yê 2018 û 2019î bajarê feqîrî reyna bajarê Kurdîstanî yê. Nê bajaran ra yew zî bajarê Wanî yo ke nufusê ci 200 hezaran ra zafêr o. Serekê Heyetê Rayberdişî yê Odaya Herêma Muşavîranê Malî û Muhasebekaran ê Serbestan yê Wanî (SMMMO) Îbrahîm Şahînî vat na feqîrîye netîceya polîtîkayanê dewlete yê bizanayîşî ya.

Şahînî bale ant ser ke dewlete Kurdîstan de qet sermayegozarî nêkena û vat: ''Bitaybetî semedê berardiş çîyêk nîno kerdene. Nê herêman de ciwanî zafê û kar çîn o û seba ke ciwanî bibê wayîrî karî xebatêke zî çîn a. Dewlete cara nê herêman kena feqîr. Dewlete ganî berpirsîyarîya xo bîyaro ca. Çareyê nê haştîye, demokrasî, heqê merdiman û caardişê huqûqî yo. Ganî her hetê Tirkîya de seyyewbînî berê têgêrayene. Bajarê ke feqîrê ganî sere de semedê înan hemleyê berardişî bêro kerdene. Eke nê bajaran de demokrasî û heqê mediman bêro înşakerdene merdimî zî hîna zaf sermayegozarî kenê. Ganî fîrmayê ke tîya sermayegozarî kenê xeyêtk garantî bêrê dayene. Bitaybetî semedê heywankarîye û zîretî erazî û wareyê ma yê hîra estê. Hewce nêkeno ke her kes endustrî dir eleqedar bo. Her herême goranî goreyê taybetîyanê xo ganî  kar bikero.''