Şarê Qendîlî ke timûtim teyarayê şerî yê tirkan ey ser o bombayan varneno vera îdareyê Hewlêrî hersê xo ard ziwan ke vera hêrişê dewleta tirke yê vera Başûrê Kurdîstanî bêveng o. Hemwelatîyan vat îdareyê herême kesê ke ameyî kiştene hûmara înan nimineno.
Şarê Qendîlî ke ANFyî rê qisey kerd ard ziwanê ke kesê ke bombardumanê dewleta tirke de yenê kiştene mergê înan hetê Dezgehê Tibê Edlîyî yê pabesteyê hukmatê herême ra yenê nimitene.
Dewijanê Zergelê ke 5 serrî verê cu dewleta tirke 5 dewijê ci yê sîvîlî qetil kerdî û 17 kesî birîndar kerdî de hema rêçê qirkerdişê tirkan estê. Dewijê ke merdimê xo hêrişê dewleta tirke de vînî kerdî vera hukmatê herême ke rixmê qirkerdişê şarî sîvîlî paştî dano dewleta tike, hêrsbîyaye yê.
Raporanê sexteyan ê mergî amade kenê ke qirkerdişanê tirkan binimine
Nê dewijan ra Mihemed Salîh Resûlî vist vîrî ke bombardumanî dewam kenê û vat: ''Dezgehê Tibê Edlîyî yê Soranî ke pabesteyê hukmatî yo de doktorî kesê ke hetê dewleta tirke ra ameyî kiştene niminenê. Raporanê sexteyan ê mergî amade kenê ke sebebê merdî sey qezayê tirafîkî ya zî teqayîşo ke sebebê nîno zanayene nusenê. Îdareyê Herême yê Başûrê Kurdîstanî plankerde raştîyan nimeneno ke no nîno qebulkerdene. Kortek de 5 hemwelatîyê ma hetê dewleta tirke şehîd bîyî la çi heyf ke derheqê babete tehqîqatêk nêame destpêkerdene. Ne zî kesêk ra hesab ame persayene. Coka herêşî dewam kenê. Ma mîyanê tersî de ciwîyenê. Ma ne eşkenê rehet şirê hêgayanê xo ne zî pesê xo kayan de biçerênê.''
Hewlêr de tirkêk merd Tirkîya kriz vet la ê tim kurdan mirênenê hukmate herême bêveng o
Mihemed Emîn Xidir zî hêrişê dewleta tirke de bîyo birîndar. Reyna nê hêrişî de lajêkê xo, maya xo û di merdimê xo yê bînî vînî kerdî. Xidirî ard vîrî ke teyarayê şerî yê dewleta tirke pîya bi Zergelê doyê Balayan, Kortek, Suredê, Beredê, Aşbûlke û Bolê yê Qendîlî zî hedef genê û vat: ''Hedefê dewleta tirke têna PKK nîyo, hêrişê sîvîlan kenê. Ez sey babîyê pêşmergeyêkî hukmatê herême rexne kena. Hewlêr de tirkêk merd Tirkîya dinya wirzna pay, la Binerê Qendîlî de tim dewleta tirke kurdan mirênena hukmate herême naye nêvînayîşî ra yeno. Çew derheqê nê şehîdan de qisey nêkeno. Ez hukmatê Hewlêrî ra persena; gonîya ma ke rişîyena gonî nîya?''
Şewe roje teyarayê şerî ma ser ra gerenê
Eyşê Nebî Xidîra ke xeylêk merdimê ci hêrişê dewleta tirke de ameyî kiştene, aye zî nê vatî: ''Şewe roje teyarayê şerî ma ser ra gerenê. Heta nika nê hêrişan de 9 merdimê mi ameyî kiştene. Banê ma pê bombayan rijna. Rixmê nê hêrişan çirey nêameyî ma nêpersayî û tehqîqatêk nêda destpêkerdene.''
