Hêrişê dewleta tirke û çeteyanê ci yê vera Awbendê Tişrînî dewam kenê.  Çeteyê ke dewleta tirke ra paştî genê perey dewanê Qijlê û Xirbêt Zimala ra hêrişê Awbendê Tişrinî kerd la şervananê Meclîsê Leşkerî yê Minbicî û YPJ û QSDyî cewab da hêrişanê îşxalî. Xoverdayîşê Tişrîn û Qereqozaxî 14 rojî yo bêmabên dewam keno. Şervanî bi hewayêkê qerardarî vera hêrişan têkoşîn kenê.

Fermandaranê hêzanê pawitişî yê Awbendê Tişrînî ra Vîyane Soran ard ziwan ke ê hêrişê dewleta tirke û çeteyanê ci betal kenê û derheqê rewşa hêzanê pawitişî de nê vatî: ''Dewleta tirke û çeteyanê ci di hetan ra hêriş kerd. Hêrişanê xurtan kenê la nêeşkenê aver şirê. Na rewşe çeteyî bêçare verdayî. Çunke Tişrîn de xoverdayîşo tarîxî yeno kerdene. Ma vera hêrişê înan perey zî cewabo gird da, xeylê çeteyî merdî û birandar bî. Serkêşîya YPJ, QSD û YPGyî de heme planê înan ê leyminî yenê betalkerdene. Bi çekanê tewr giranan hêriş kenê, ma zî bi taktîkanê neweyan cewab danê.

Ma eşkera ramojna ke ma senî cewabê çeteyanê îşxalkeran ê dewleta tirke danê. Ma qet hêrişêkî qebul nêkenê ke destkewteyanê şar û şorişê ma hedef genê. Ma zaf hole zanê ke ma senî bi taktîkanê neweyan hêrişanê dişmenî betal kenê. Vatişê dewleta tirke yê 'ma awbend fînayo dest' raşt nîyo. Ma Awbendê Tişrinî de bi ruhê xoverdayîşî têkoşîn kenê.''