Rojêke badê serrgêra qirkerdişê DAÎŞî yê vera Şingalî 4ê tebaxe de Kampa Cemişkoyî ya Zaxoyî de Axîna 6 serrîye û pîyê ci Faruk Mîrza ameyî remnayene. Wextêk dima ra kênaya qişkeke merde ameye vînayene ke velgê ci amebi vetene. Ame tespîtkerdene ke bedenê ci de rêçê hêrişê cînskî est ê. Pîyê ci Farkuk Mîrza zî ziwanê ci amebi raqilnayene.

Hukmatê herême derheqê nê wehşetî de qet eşkerayîyêke nêda. Meclîsê Şarî yê Xanesorî yê Şingalî derheqê babete eşkerayîye daye. Eşkerayîya ke verê banê meclîsî de ameye dayene hetê êndamêka Têgêrayîşê Cinîyan ê Azadan ê Êzidîyan  (TAJÊ)  ra ameye wendene.

Eşkerayîye de veng dîya hukmatê Bexdadî ke wa sûcdarî bêrê cezakerdene. Meclsê şarî bale ante ser ke reya verêna ke kampanê Başûrê Kurdîstanî de çîyêko winayên beno û vat: ''No pê destê yew kesî nîno kerdene. Nê hêrişê hetê torrêka pabesteyê Hukmatê Kurdîstanî ya ra yenê kerdene. Coka sûcdarî nînê cezakerdene. PDK şarî  pê zorî kampan de tepişteno û destûr nêdano agêrê Şingalî. PDK ne înan paweno ne zî destû dano agêrê. Ganî şarê kampe û heme kurdî semedê Axîne wirzê payan ser.''