Dîlane Înanç 23 serre ya, qezaya Farqînî ya Amedî ra ya. Dima ke kekê ey SÎdar Înanç teslîm bi a zî kewta mîyanê torra ajanîye. Dîlane Înanç pare kerd ke xalê naja ci Kemal Mergen pê dek û dolaban a kerde ajane.

Kemal Mergen pê sozê zewajî aye xapîneno û Dîlane Îstanbulî ra remneno. Mergen Amed de hetê polîsan ra tepişîyeno. Kemal Mergen o çax mîyanê dewlete de ca beno. Kemal Mergen wazeno facebookî ser o Dîlane Înanç reyde têkilîye rono. La Dîlane Înanç naye red kena. Kemal Mergen şanêk pê wesayîtî Dîlane Înanç remneno û tay kesan reyde tecawuzê aye keno û tira gef waneno. Dîlane Înanç nê gefî ser o bena ajan.

Dîlane înanç yena perwerdekerdene û Kemal Mergenî reyde dest pê karî kena. Dîlane Înanç îtîrafanê xo de wina qala perwerdeyî kena: ''Verî pê fikrê 'welat wayîrê ma vejîyeno, mi paweno' mezg yeno dekerdene dima zî perwerdeyo leşkerî dest pêkeno. Endamê MÎTî vanê dewlete wayîrê to vejîyena ti zî wayîra ci vejîye. Mi soz da ke ez vera dişmenanê dewlete şer bikera. Sozê şerê vera PKKyî û qesasî. PErwerdeyo psîkolojîk zî dîya mi.''

Ajane Înançe vat ke dima semedo ke ters, hîsî û wijdanî werte ra wedarîyê înfazî dîyenê kerdene yanî dest pê prosesê pratîkî kenê.

Înançe 2014 de keyeyanê verê Şaredarîya Amedî ser o îtîrafî kerdî. Kesanê ke 4ê hezîrana 2014î de verê bînaya Şaredarîya Amedî de roniştêne DBP, HDP û PKK kerdêne hedef, fotografê domananê xo berz kerdêne û îdîa kerdêne ke PKKyî domanê înan remnayê. Medya û hukmatê AKPyî zî bi nê hawayî hêrişê Têgêrayîşê Azadîye yê Kurdîstanî kerdêne. 

Dîlane Înanç nê keyeyan ser o wina îtîrafî kerdî: ''Nê keyeyan ra domanê tayînan şîbîy koyan labelê tayênî zî nêşîbîy.  Hetê MÎTî ra kişîyabîy. Mi bi xo nînan ra 3 teni kiştî. Serra înan mabênê 22-24î bi. O çax dewlete pere dayêne nê keyeyan û fotografê înan ê domanîye dayêne.Wexto ke mi televîzyon de no dî ez hêrs bîya mi vat 'PKK domanan xapîneno beno koyan.' Kemaş zî mi rê vat 'Ti raşta zî vana qey ê pêro tewrê PKKyî bîyî. Keyeyê 3 ciwananê ke to kiştî uca de yê.' Dima mi mekanîzma fam kerde. Kişîyayîşî ra dima pê rayîrê ajanan vatêne 'Domanê şima tewrê PKKyî bîyî.' Keyeyê welatperestî cara nêkewtêne ney dima. Tay keyeyî zî pê rayîrê îqna û xapînayîşî ameyêne rêxistinkerdene.

Ez kiştox bîya, mi keyeyan de qisey nêkerd. Ajananê bînan nê keyeyan de qisey kerd. Ajananê tewr bînan zî ciwanî remnayêne yan zî derheqê ciwanan de îstîxbarat arê dayêne.''

Dîlane Înan perwerde û pratîkî ra dima semedê weîfeyêkê neweyî ameye perwerdekerdene. 2015 de a sey ajane tewra gerîlayan bîye. Armancê ci kiştişê îdarekaranê payeberzan ê PKKyî bi. Înançe nameyê Zîlane Berxwedan kerd xo ra.

Înançe xîret kerd ke xo binima la gerîlayî pê ci hesîyenê. Dima ke tepişîyena kerdişê xo îtîraf kena.