Partîya Şaran a Demokratîke (HDP) xebatanê xo yê weçînitişanê cayayîyan ê 31’ê Adare dewam kena. Xabetê girseyî yê ke Amed û qezayanê bînan de bi tewrbîyayîşê namzedanê hemserekan û şarî reyde yenê kerdene, her ke şono hîna zêde benê. Bi nêzdîbîyayîşê weçînitişê cayayîyan ê 31’ê Adare tehdît û bêûsulîyê tifaqa AKP-MHP’yî ya kanpereste zî dewam kenê. Hetkarê hemserekê HDP’yî yê Amedî Mustafa Akengîn, qalê xebatanê partîya xo ya Amedî û vernîgirewtişê ke vera hîleyanê weçînitişî de girewtê de ANF’yî rê qisey kerd.

DI QEZAYÊ KE MA DEST DE NÎYÊ ZÎ MA DO BIGÊ

Akengînî ard ziwan ke partîya ci seba weçînitişê cayayîyan ê 31’ê Adare bi rengêkê bihêzî amadekerîye kerda û vat ê hetêk ra Tirkîya de paşt danê namzedanê bihêzan û hetê bînî ra zî Kurdistan de bi namzedanê xo kewenê weçînitişî û wina dewam kerd: ’’ Ma pêroyî yê Amedî de 17 qezayan  û bajarê girdî de bi namzedanê xo kewenê weçînitişî. Rewşa ma baş a û ma cehd kenê ke qezayanê Çêrmûge û Şankuşî zî bigê. Seke şima zî zanê, nê serranê peyênan de herême de semedê bîyayîşan ra travmayê girdî ameyî orte. Îdareyanê xoseran reyde şarê nê bajarî hama-hama beşêk bajarî de merdimî zaf asan û cayêko bisayîşî de ciwîyayêne, hetê bînî de bi tank û topan taxê bajarî ameyêne çinkerdene. Ma ê prosesî dîyî û ma ê rojan ra derbaz bîyî. Nika zî ma bi travmayêka winasîye kewenê weçînitişan.”

BAJARANÊ XO QEYÛMAN RA PAK BIKERÊ

Akengînî ard ziwan ke, bi wesîleya weçînitişanê cayayîyan ê 31’ê Adare ganî bi rengêkê rastî xorexneyê xo bidê vat, “Rasta zî ma şaredarîye û wareyê şexsîye zafêrî kerdî têmîyan. Ganî ma 5 serrane mabênê serranê 31’ê Adare 2019-2024’î de, zereyê amadekarîya modelê şaredarîya herêmkîye de bê û ma nê modelî hemeyê Tirkîye de sey modelêko cîya bîyarê ca. Kombîyayîşê ke ma şarê Amedî reyde kuçeyan û qehwexaneyan de kerdo de, zaf asan vînenê ke şar wazeno ke qeyûmî  tîya ra bêro vetene. Helbet reaksîyonê ke nêresenê kuçeyan zî estê. Eke şarê ma ke nêno partîye, tîya de kêmasîya esta. Ma nê kêmasîyanê xo vînenê û wextê verê ma de ma do nê kêmasîyanê xo hal bikerê. Şarê xo reyde herême ra ver bi îqtîdarî bişorê û bajaranê xo qeyûman ra pak bikerê.”

MA HEME SINDOQAN DE RÊXISTIN Ê

Akengînî derheqê amadekarîyê teknîkan ê  weçînitişanê cayayîyan ê 31’ê Adare de zanayîşî dayî û vat, “Amed de nêzdîyê 1 mîlyon û 48 hezar weçînitoxî estê. Hûmara sindoqanê ma zî 3 hezar û 642  a. 197 hezar wendegehan de sindoqî do bêro awankerdene. Ma heme sindoqan de rêxistin ê. Ma na babete de heme tedbîrê xo girewtê.  Çi beno, dimayê padayîşê sindoqan û berdişê heyetê weçînitişî de beno. Endamê ma yê heyetê sindoqe, dimayê padayîşê sindoqan zabitnameyanê xo yê bi îmzahîtinan do bigêrê. Komîsyanê ma yê rêxistine yê weçînitişî yê qezaye esto. Her qezaye de biresnê yewîne ya karanê weçînitişî yê bajarî. Uca ra zî bi merkezê pêroyîye torrêk do ware bîyarê.”

ŞARÊ MA GANÎ RAYANÊ XO RÊ WAYÎR BIVEJÎYO

Akengînî da zanayene ke Amed de problem çin o û vat, “Bajaranê Kurdan de qesawetê ma yê cidî çin ê. Mado nêverdanê ke ê do rayêk bidiznê. La rojawan de eşkenê naye bikerê. Mesela, qezaya ma Pasûr de 946 rayê weçînitoxanê ma qerisnayî. Verê heqê weçînitişê weçînitoxan girewt. Ma fikirîyenê ke, asayîşê weçinitişî  Amed û bajaranê Kurdan persêk nêvejîyeno. La ganî şarê ma yo ke rojawan de rayanê xo dano ganî rayanê xo ra wayîr bivejîyo.”