Qezayanê Elbax, Qelqelî, Erdîş û Ebexî yê Wanî de menga tebaxe de laser de nêzdîyê di hezar pez, dewar merdbîyî û 400 keyeyî zî binê awe de mendbî. Selahîyetdaranê hukmatî warê laserî de şarî rê vatbi 'Wa HDP hetkarîya şima bikero madem şima raya xo daya ci.'

Heman wextê laserê Wanî de şaristanê Tirkîya Rîze de zî laser werişt la hukmatî uca cade sey warê afetî îlan kerd. Hukmatî wextê erzlerzê Wanî de zî herême sey herêma afetî îlan nêkerdbî.

Temsîlkaranê partîyan ê sîyasîyan û dezgehanê sivîlan semedo ke Wan sey herêma afetî nêame îlankerdene nêrazîbîyayîşê xo mojna.

Sîyasetmedarê Elbakî Daştan Şîmşekî da zanayene ke HDPyî Elbak de se ra 90ê rayî girewtî û vat: ''Waranê bînan de afetêko qij zî bo war cade sey herêma afetî yena îlankerdene. La AKP tîya de goreyê rayan têgêreno.''

Hemşaredarê Ebexî Faruk Demîro ke herinda ci de qeyûm amebi tayînkerdene vat: ''Tirkîya de wexto ke afetêk qewimîyeno verî HDP şino uca. La îqtîdar goreyê etnîsîte nêzdîyê afetan beno. Ma no erdlerzê Elbakî û Wanî de dî. Endamê Heyetê Îdareyî yê Merkezî yê AKPyî Osman Nûrî Gulaçarî wextê laserî de dewan de vato 'Eke şima raya xo bidê HDPyî wina beno. Wa HDP bêro hetkarîye bido şar.' ''

Wekîla HDPyî ya Wanî Muazzeze Orhan vat: ''10 serrî yo Wan yeno cezakerdene. Îqtîdaro ke nêeşkeno îradeyê şarî teslîm bigêro wina afetan vurneno rantî. AKP herême ser o wazeno menfaatêkê sîyasî bivisno destî. Wan de laser werişt, Dêrsim û Şirnex de şewat vejîya. Îqtîdar nêeşkeno meseleyan çareser bikero.AKPyî şar terkê mergî kerdo.''