Aktîvîstê siyasî Hawrê Kurdîyo ke seba ke vera îşxalê dewleta tirke yê serê Başûrê Kurdîstanî têgêrabi û bi hedefê hêrişan bale ante gefanê PDKyî ser. Kurdîyî vat: ''PDK armanc keno ke m, Hewlêrî ra vejo.''
Partîya Demokratîke ya Kurdîstanî (PDK) her roje bena sebebê tepişîyayîşê rojnameger, çalakîker, mamostayan.
Aktîvîsto sîyasî Hawrê Kurdî bi desan reyî hetê hêzanê Asayîşê PDKyî ra tepişîya û maruzê hêrişanê PDKyî bi. Hawrê Kurdîyî facebook de vîdeoyêk vila kerd û da zanayene ke Asayîşê Hewlêrî bêsebeb ceyranê keyeyê ci birna.
Kurdîyî vîdeo de vat: ''8 rojî yo ceyranê mi birîya. Na menga Remezanî de ma nîyanê tarîtîye de yê. Têna ceyranê mi birîyayo.''
Hawrê Kurdîyî derheqê babete de ANFyî rê qisey kerd. Kurdîyî ard ziwan ke 19ê çeleyê 2021î de komêka nenase hêrişê ci kerdo. Kurdîyî keyeyê xo hewilna taxa Eskerî ya Hewlêrî la narey zî ceyranê ci birîyayo. Kurdîyî da zanayene ke Asayîşê Hewlêrî semedê şîîranê ci yê vera îşxalkerîye ey ceza keno.
Kurdî 27ê hezîrana 2017î, 20ê hezîrana 2020î û 19ê çeleyê 2021î de maruzê hêrişanê Asayîşê PDKyî bi.
