Platformê Demokrasî û Kede yê Amedî bi wesîleya 1ê Êlule Roja Haştîye ya Dinya verê ACZ Plaza yê Yenîşehîrî de eşkerayîyêke daye.

Hemserekê KCDyî Berdan Ozturk, aktîvîstê Têgêrayîşê Cinîyan ê Azadan (TJA), Mayê Haştîye, wekîlê HDPyî saruhan Oluç, Semra Guzel, Pero Dundar, Garo Paylan, Hişyar Ozsoy, Ebru Gunay, Mahmut Togrul, Remzîye Tosun, xeylêk îdarekarê DBPyî û şar tewrê eşkerayîye bîyî. Polîsan girse girewt binê ablûqa.

Polîsan verî destûr nêda eşkerayîye. Mayanê Haştîye laçikê xo yê sipî eştî war û nêrazîbîyayîşê xo mojna. Dima ke şarî apey gamêke nêerzaye eşkerayîye ameye dayene.

Eşkerayîye de ame vatene ke welat de hewcedarîya haştîye esta la rixmê ney zî îqtîdar polîtîkayanê şerî zêdîneno.

Maya Haştîye Nafîye Yîgît zî ard ziwan ke ê do vengdayîşê semedê haştîye dewam bikerê û vat: ''Heta ke tecrîd nêqedo haştîye nêna. Ma vanê ke hînî bes o.''

Hemşaredarê Amedî Selçuk Mizrakliyo ke Zîndanê Bunyanî de tepişte yo, mesajêk şawit. Mizrakliyî mesajê xo de pare kerd ke ganî kurdî yewîya xo bîyarê ca û haştîye awan bikerê.

Serekwekîlê Grûba HDPyî Saruhan Oluçî zî qiseykerdişê xo de îfade kerd ke îqtîdar haştîye ra terseno. Oluçî ablûqa û vergirewtişê polîsan şermezar kerdî û vat: ''Îqtîdar serê polîtîkayanê şerî ra estbîyayîşê xo dewam keno. Vizêr Hezex de domanêk hetê panzerê leşkeran ra ame qetilkerdene. Bêcezaverdayîş nê qirkerdişan teşwîq keno. Ma na dişmenîya vera domananê kurdan qebul nêkenê. Ê do hesabê ney bidê. Bedelê ci se beno wa bibo ma do haştîye bîyarê ca.''

Girse pê slogan û çepikan eşkerayîye ra dima vila bi.