Wan de bi wesîleya 1ê Êlule Roja Haştîye ya Dinya hetê HDP û DBPyî ra bi şîarê '2Haştîye dana ciwîyayene'' mîtîng ame organîzkerdene.

Mîtîngo ke Parka Musa Anterî de ame kerdene bajaranê dormeyî ra zî xeylêk kesî tewrê ci bîyî. Bi hezaran kesê ke tewrê mîtîngî bîyî pê pankart û slogana vera tecrîdê serê Rayberê Şarê Kurdî Abdullah Ocalanî nêrazîbîyayîş ramojna, xoverdayîşê zîndanan selam kerd û mesajê pîlkerdişê têkoşînî dayî. Hemwelatîyê ke sey grûban kewtî warê mîtîngî pê tîlîlîya govende gorewte. Biseyan kesê ke verê banê HDPyî  ameyî têhet ê zî pîya bi Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindirî verê xo da warê mîtîngî.

Mîtîng pê konserê Koma Aryene dest pêkerd û dima ra qiseykerdişê akerdişî hetê Serekê Komîteya Amedekarîye Omer Işikî ra ame kerdene. Işikî vat meselaya kurdî têna bi haştîye eşkena bêro çareserkerdene. Dima ra hunermend Nucane Degîrmencî vejîyaye sahneyî ser. Bado ke hemwelatîyan bi deyîranê Degermencîye mirda govende girewte, Hemsereka HDPyî ya Bajarî Handan Karakoyun qisey kerd. Karakoyone ard ziwan ke ê semedê vengdayîşê haştîya bianore ameyî têhet. Vervatoxê Platformê Kede û Demokrasîyî Îbrahîm Çelkîzî bale ante polîtîkaya îqtîdarî yê îmha înkarî ser û vat kurdî sey tim ewro zî vanê haştîye.

Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindir û wekîlan pîya sehne de gogerçînê haştîye firnayî.

Kesîn Bayindîrî nê vatî:  ''No voverdayîş û têkoşîn do ameyoxê kurdan bewlî bikero. No têkoşîn do azadîye bîyaro. Ewro ma bi wesîleya roja haştîye wazenê qala haştîye bikerê la rîyê hêzanê şîdetî ra ma qala şerî kenê.  Wazenê polîtîkayanê şerî xorîyêr bikerê. Serkêşîya şaran de Rojhilatê Mîyanênî de xoverdayîşo tarîxî dewam keno.  Rayraşîyayîşê haştîye û azadîye dewam keno. Şer qederê kurdan nîyo. Seserra 21. Do bibo ya kurdan. Îqtîdarê AKP-MHPyî polîtîkayanê şerî de israr keno û wazeno yewîya kurdan bişikino. Vera nê polîtîkayanê înan kurdan heta ewro senî xover da ewro ra tepîya zî do wina xover bidê. Îqtîdar şerê Kurdîstanî serê Abdullah Ocalanî ra rayra beno. Eke şima wazenê nê welatî polîtîkayanê çareserî bifînê dewre ganî şima verî tecrîdî wedarê. Waştişê şarê ma no yo. Amerîka 40 serre Afganîstan de polîtîka rayra berde tewr peynî peyser ancîyaye. Qet yew hêz pê polîtîkaya şerî ser nêkewt û do mekewo. Polîtîkaya şer û asamîlasyonî ya vera kurdan do çirey ser nêkewo. Çareserî wedartişê tecrîd  û peyserantişê qeyûman o. Roje roja azadîya kurdan û çareserkerdişê meseleya kurdî ya.''

Bado ke Hunermend Murat Demîrî sehne de deyîrî vatî,  Pervîne Buldan qisey kerd.

Buldanê vat: ''Ma zanê ke nê herran de dejê pîlî ameyî antene, bedelê pîlî ameyî dayene û semedê haştîye tim têkoşîn yeno kerdene. Polîtîkaya şerî yê îqtîdarî  welat fînayo mîyanê krîzan. La ma 2013 de dî ke pê dîyalog û muzekeran çareserî mumkun a. Seba ke îqtîdarî polîtîkayanê înkar û asîmîlasyonî de israr kerd welat seserre peyser şi. Rojhilatê Mîyanênî de heme şerê ke benê nê îqtîdarî Tirkîya fîna mîyanê ci. Ma wazenê derheqê haştîye de reyna muanqeşe bikerê. Ma do 27ê êlule de deklarasyonêk bidê. Ma venga heme hetanê biwîjdanan danê. Ganî îtîfaqê haştîye bêro ronayene.  Ma sey HDPyî do waştişanê xo yê semedê haştîye bîyarê ziwan.''

Mîtîng pê deyîranê Grûb Abdal qedîya. Badê mîtîngî bi slogananê ''Biciwîyo Rayber Apo'' û ''Bicîwiyo xoverdayîşê zîndanan'' rayraşîyayîş ame kerdene. Polîsan seba ke sloganî merê eştene mudaxale kerd  û dima ra hêrişê hemwalatîyan kerd.