Amed de serkêşîya Komeleya Cigêrayîşê Ziwan û Kulturî yê Mezopotamya  (MED-DER), Entîtuyê Kurdan û DPByî bi wesîleya 21ê Sibate Roja Ziwanê Dayîke de rayraşîyayîş ame kerdene. Rayraşîyayîşo ke verê DBPyî ame destpêkerdene heta Parka Koşuyoluyî bi sloganan dewam kerd.

Eşkerayîya ke bi kurmanckî û kirmanckî ameye dayene hetê Hemsereka DBPyî ya Amedî Sultane Yaray û îdarekarê MED-DERî Suleyman Yilmazî ra ameye wendene.

Eşkerayîye de bale ameye antene tarîx û zengînîya kurdkî ser û nê ameyî vatene: ''Çi heyf ke kurdî hema wayîrê statuyî nîye û perwereyê bi kurdkî nêvînenî. Ziwanê kurdkî xeylê waran de yeno qedexekerdene, binê zext û hêrişî de yo. Ziwanê kurdkî binê tehlukeyê rijnayîş çînbîyayîşî de yo. Ziwanê kurdkî meclîs û dezgehanê fermîyan de nîno qebulkerdene. Kurdan rê her qeyde zextî benê. Her hetê Kurdîstanî de dezgehê dewlete seba ke kurdkî asîmîle bikerî xebityenê, mirnayîşê kurdkî sucê merdimîye yo.

Xora dewleta tirke estbîyayîşê xo çînbîyayîşê kurdan ser înşa kerd.Tecrîdê serê Rayber Apoyî nimuneyo tewr muhîm o. Birêz Abdullah Ocalan tarîxî ra tim bi paradîgmaya xo vano azadîya heme ziwanan, kulturan û nasnameyan wazeno û semedê nê têkoşînê xurtî rayra beno. Sere de ziwanê kurdkî derheqê ziwanê dayîke de xeylê erjnayîşî kerdbî semedê pawitişê ziwanê kurdkî û ziwananê bînan veng dabi. Birêz Ocalan binê tecrîdê giranî de hema zî semedê haştîye û azadîya  heme netewe û ziwanan têkoşîn keno. Seba ke sîstemêkê demokratîke de kurdkî û ziwanê bînî bibê wayîrê statuyî û bibê ziwanê fermî xebityeno. 

Tecrîdê serê Birêz Abdullah Ocalanî eynî wextî de tecrîdê serê kurdkî û ziwananê bînan xorîn keno.  Bêşik têkoşîno ke semedê azadîya Birêz  Ocalanî yeno kerdene eynî wextî de semedê azadîya kurdkî û ziwananê bînan o. Reyna pawitişê Rojawanî zî pawitişê kurdkî û ziwananê bînan o. Ganî ma her warê cuye de  bi qiseykerdiş, wendiş, nuştiş û musayîşê kurkdî wayîrê ziwanê xo bivejê. Qanî ma vera her qeyde zextan semedê azadîye û statuyê kurdkî, perwerdeyê kurdkî têkoşîn bikerê; sey şervanê ziwan, kultur û erjanê xo bixebitê.''