Tevgera Jinen Azad (TJA) bi wesîleya 8ê Adare Roja Cinîyan ê Kedkaran a Dinya qezaya Mîdyadî ya Mêrdînî de startê aktîvîteyanê xo da. Semedê rojnamegerê Cîhane Bîlgîn a Rojawan de bi droneyê dewleta tirke ameye qetilkerdene, aktîvîteyî Mîdyad de ameyî destpêkerdene.

Hemşaredar û parlamenterê DEM Partî zî tede cinîyê ke meydanê sûkê Mîdyadî ameyî têhet bi tîlîlîyan û sloganan gonvede girewte. Cinîyan dima ra dest pê rayraşîyayîşî kerd.Cinîyan ke bi kincanê xo yê tradîsyonkî dîmenê rengîn fînayî meydan , fotografê cinîyan ke ameyî qetilkerdene kiriştî.

Cinîyan rixmê astengkerdişê polîsan bi slogananê “Jin jiyan azadî”, “Bijî berxwedana jinan” û “Cihan Bilgin rûmeta meye” heta warê Newroze rayraşîyayîş kerd.

Vervatoxa TJA ya Mêrdînî Hatîce Oncu ard ziwan ke ê vera hêrişanê îqtîdarê AKPyî û camêrd-dewlete 8ê Adare de têkoşînê xo bidomnê.

Dima ra bi nameyê cinîyan ê suryanîyan Marta Aktaş û bi nameyê cinîyan ê ereban Nurcane Aydin qisey kerd, 8ê Adare pîrzoz kerd û mesajê xurtkerdişê têkoşînî dayî.

Wekîla DEM Partî Bêrîtane Guneş vat: ''Berzeyo ke Birêz Ocalanî eşt binê herre, ewro vera tarîtîye dara pîyaciwîyayîşî girde kerd ke heme şarî binê versîya na dare de ameyî têhet. Rojawan de na raştîye vejîyaye werte.''

Endama TJA Ayla Akat Ata zî nê vatî: ''Ma vizêr çok nêda, ewro zî çok nêdanê. Dayîkan ê kurdan senî ke vizêr bi vengê berzî qala vate, ewro zî vanê, peyser game nêerzenê. Xeyalê ma çîyêko bimbarek o.Têkoşînê semedê çareserîya demokratîke ma rê erjo tewr gird o.Çunke ma vanê cuye. Çunke ma vanê azadîye. Çunke ma vanê cinîye. Çunke ma vanê Jin, Jiyan, Azadî.''

Badê eşkerayîye cinîyan bi gonvende û deyîran şayîye organîze kerde.