Destpêkê menga temmuze de îqtîdarê heqê ceyranî se ra 15, heqê gazê xozayî zî se ra 12 kerdî vaye. Pawîyeno ke vaykerdişî bizêdîyê. Semedo ke krîzo ekonomîk beno xorin hemwelatîyî nêeşkenê faturayanê xo bidê. 

Cinîyanê Amedî vaykerdişê neweyî ercnayî.

Nacîye Fîdan ard ziwan ke ê nêeşkenê pê meaşê kokimîye debara xo bikerê û vat: ''Meaşê mi 763 lîra yo, no pere kamî rê vejîyeno? Der û dore ra nêbîyêne ez gês vera merdêne. Ma pê nan û awe pîzeyê xo kenê mird. Vaykerdişan ra semed ma tersenê ceyran û gazî bişuxilnê. Hukmat nêvano nê merdimî senî debara xo kenê?'' 

Nûpelda Ozturka ke semedê îmtîhanî xebitîyena vat: ''Babîyê mi netîceya qezayêkî de înşaat de merd. Her roje vayê neweyî yenê. Ez nêeşkena kitabanê xo bigêra. Prosesê janî de nêzdîbîyayîşê dewlete yê bi hemwelatîyan rîyê înan o raştikên eşkera kerd. Merdimî mehkumê vêşanîye ameyî kerdene.'' 

 Hatîce Karataşa ke karkera serrwextî ya vat: ''Mêrdeyê mi nêxebitîyeno. Ez şina Ordu, Meletî pê yewmîyeya 50 lîra xebitîyena û ewnîyena 10 kesan. Ez nêeşkena miqatê domananê xo vejîyê, vayan ra ma mehf bîyî. Ma ge ge benê muhtacê nanê wişkî.'' 

Kedkarê keyeyî Îpek Akkabak û Azîze Ozturk zî ard ziwan ke ê nêeşkenê hewcedarîyanê esasîyan bigêrê û vayan ra semed vera benê feqîr. Cinîyan vat: ''Esnafan ra heta kedkaranê keyeyî her kes pêr pêrîşan o. Ma prosesê janî de zî dewlete ra destek nêdî.''