Fermandaranê HPGyî ra Heqî Armancî Radyoyê Dengê Welatî rê derheqê çalakîyan û xoverdayîşê gerîlayan de qisey kerd.

Qiseykerdişê Armancî ra beşêk wina yo:
''Gerîlayan xoverdayîşê Heftanînî de destkewteyê pîlî vistî xo destî. Dewleta tirke operasyonanê qirkerdişî dewam kena. Rojawan de zî operayonê îşxalî estê. Girê Sipî, Efrîn û Serêkanîyê de şarê ma remnena, qetil kena. 

Dewleta tirke armanc kena ke Başûr îşxal bikera. Kamca de kurdî estê benê hedefê dewleta tirke. Dewleta bi îşxalê Heftanînî Efrîn-Qendîl-Xakurkê de wazena herêma tampone awan bikera û dima pêro Kurdîstan îşxal bikera.

Dewleta tirke wina fikirîyayêne ke emser operasyonê vera Heftanînî biqedîna la xoverdayîşê gerîlayan planê ci pûç kerdî. Tay girê stratejîkî kewtî destê dewlete la vera nînan artêşa tirke ya îşxalkere vînkerdişê pîlî dayî.Vanê operasyonê vera Heftanînî qedîyayî, no raşt nîyo. Artêşa îşxalkere tersê gerîlayan ra nêeşkena bikewa zereyê Heftanînî. Beno ke operasyon dima bêro qedînayene la bi naye ê do biwazê pozîsyonê xo zixm bikerê.

Operasyonê vera Vakur û Başûrî bi hemkarîya tay kurdan ê bêbextan yenê kerdene. Nînan ra tay kesî vejîyayî verê gerîlayan. Nê kesî rayîranê nimitkeyan ra leşkeran anê Heftanîn. 

Dewleta destpêkê serra 2020î ra nata bi nameyê 'Yildirim'î  herêmanê Cûdî, Zagros, Serhed, Dêrsim, Amanos, Çewlîk, Amed û Mêrdînî de operasyonê îşxalî kena û wina aseno ke nê operasyonî do dewam bikerê. Nê operasyonî ser nêkewenê. Seba propaganda nê operasyonî yenê kerdene.

Dewleta tirke ya faşîste bi taybetî serranê peyênan de Dêrsim û Botan de daristanan vêşnena, xoza texrîb kena û baregehan nana ro. Êyê ke nê cayan de hemkarîya dewleta tirke kenê do nêrê efûkerdene. Ma nînan şinasnenê, nameyê înan ma de yê. Ê do bibê hedefê ma.

Rol û mîsyonê gerîlayan estê. Gerîlayî na çarçewe de çalakîyan kenê, têgêrenê. Gerîlayî do çalakîyanê xo bikerê pîl, bizêdînê. Vakurê Kurdîstanî de gerîlayî derbanê giranan danê dişmenî ro. Nê çalakîyî tesîrê şar, têgêrayîş û Rayberê ma kenê. Gerîlayê ma wayîrê bawerî, qerardarî, înîsîyatîf ê. Ê dişmenê xo hol şinasnenê. Hêzo ke do rejîmê faşîstî çin bikero, gerîla, kurdê welatperwerî, Têgêrayîş ê. Ê rayber ê. Coka ganî her kes bi hawayêkê raştî wezîfeyê xo bîyaro ca.

Dewleta tirke her hetî ra mabênê krîzêkê pîlî de ya û vera bena pûç. Nê faşîzmê AKP-MHP-Ergenekonî qelsîya înan a. No pûçbîyayîş mojneno ke dewlete ver bi rijîyayîşî şina.''