5ê hezîrane de wesayîto zirxîn ê pêşmergeyan amebi pirodayene. Derheqê babete de Rojnameger-nuştox Kemal Rauf û Akademîsyenê Zanîngehê Silêmanî Hewjin Mele Emînî ANFyî rê qisey kerd.

Kemal Raufî vat: ''Medyaya PDKyî verî vat 'wesayît hewayî ra ameyo pirodayene û dewleta tirke ra yeno şikkerdene.' La dima medya no tewir vurna û vat gerîlayan kerdo. Gerîlayan serebût înkar kerd. Wesayîtî ra eşkera beno ke hewayî ra ameyo pirodayene. Tirkîya rewî ra kena  ke şer bikirişa Başûrî û bingeyê birakûjî amade bikera. Tirkîya wazena hewayî ra şer bikera û PDK zî erdî ro şer bikero. La şar şerê zereyî yê kurdan nêwazeno. Armancê Tirkîya hêrişê Başûrî yo. Wa partîyê sîyasî pê kayan mexapîyê. Gereka medyaya PDKyî ziwanê dişmenîya vera gerîlayan war verda. Armanco esas ê Tirkîya îşxal û talanê Başûrî yo. Tirkîya pê nê herişan wazena hukmatê Başûrî çin bikera.Eke Tirkîya bareganê xo bizêdîna û ser bikewa hînî eşkena PDK bigêra hetê xo. Gereka sey kurdan ma bimojnê ke ma eşkenê xo îdare bikerê. Eke wina nêbo Iraq zêdêr mudaxeleyê karanê ma bikero û aramîya ma destî ra şora.''

Akademîsyenê Zanîngehê Silêmanî Hewjin Mele Emînî wina vat: ''Têgêrayîşê PDKyî Herêmanê PAwitişî yê Medya de krîz keno giranêr. PDK keno ke tay waran dest bivisno. No zî do krîz giranêr bikero û îşxalî rê rayîr abikero. Bêvengîya PDK û hukmatî mojnena ke ê hêrişanê îşxalî tesdîq kenê.  Senaryo eşkera yo. Medyaya PDKyî zî verî vat 'hêriş hewayî ra ameyo.' Birîndaran ra yewî zî vat fuze yan zî teyarayêke da înan ro. Sûcdarkerdişê gerîlayan senaryoyo plankerde yo. PDK têkilîya xo ya bi dişmenî ra wazeno serebût wina bimojno. Xora na têkilîye nê netîceyî ardî verê ma.

PDK wazeno waranê gerîlayan teng bikero, şer bişîdet bikero û pê medya vera HPGyî senaryo amade keno. Dişmenê kurdan kenê ke kurdî têvera bibê û bidê pê. Tay kurdan tarîx de bîyî parçeyê nê planan. Heyf ke rolê nê tay kurdan ra semed kurdan gonîya yewbînan rijnaye. Enfal û şerê zereyî mîsalê pîlî yê ney ê.''