28ê êlula 2009î de deweka Xanbazî ya dewa Kanî Sipî ya qezaya Licê ya Amedî de Ceylane Onkola 12 serre wexto ke pesê xo çerênayêne pê guleyê hawanî amebî qetilkerdene. Qirkerdişê Ceylane ser ra 12 serrî derbaz bîyî la hema qet yew kiştox zî nêame muhakemekerdene.

Bedenê aye yo qijkek  şeş saetan cayê serebûtî de parçe-parçe mend. Dadîya Ceylane Salîha Onkol parçeyê bedenê kênaya xo pêşê xo de arê dayî û pêro delîlî dayî Serdozgerîya Komare ya Licê. Labelê raporanê leşker û polîsan de ame vatene ke Ceylane pê dasî kişîyayo. Selahîyetdarê leşkerî yê ê çaxî Yuksel Şanliturkî keye neheq kerdbi û vatbi ke keye semedê tazmînatî xo keno mexdûr û pê vateyan waştbi serebûtî mîyan bikero.

Serra 2010î de avûkatanê keyeyê Onkolî semedo ke bira nimite ya dosyaya serebûtî bêra wedaritene muracat kerd la waştişê înan ame redkerdene. Coka avûkatan muracatê Mehkemeya Heqanê Merdiman a Ewropa (MHME) kerd. Gulana 2012î de waştişê xorinkerdişê tehqîqatî ame redkerdene. Rixmo ke hende serrî derbaz bîyî dewa nêameye akerdene û qet yew sûcdar nêame dîyene. Keyeyî coka newe ra muracatê MHME kerd. MHME 17ê çeleyê 2017î de keyeyê Onkolî zîyaret kerd û bira 'war de tehqîqato bitesîr û binpaykerdişê heqî ame binpaykerdene' daye. Serdozgerîya Komare ya Licê nîsana 2014î de bira cigêrayîşê daîmî vete. 

Keyeyê Onkolî Wezîrîya Karanê Zereyî rê dewaya tazmînatî akerde. Mehkeme bire daye ke 28 hezar û 208 lîra tazmînat bêro dayene keyeyî. Avûkatî û keye vera na bire vejîyayî. Naye ser o mehkeme bire daye ke 283 hezar lîra tazmînat bêro dayene keye.

12 serrî yo qirkerdişê Ceylane de qet yew kes nêame muhakemekerdene.  Ceylane Onkol ra têna fotografêk mend ke ê awirê çimanê ci vîrê her kesî de yê. Ewro serrgêra kişîyayîşê Ceylane Onkol a.

'Înan nêverda ke Ceylane biba pîl'

Ajansê Mezopotamya serrgêra qirkerdişê Ceylane Onkolî de dadîya ci Salîha Onkol reyde qisey kerd.

Dayîke Salîha hema zî qebul nêkena ke kênaya ci ameya kiştene. Dayîke Salîha vat: ''Kênaya mi zaf aqil bîye la înan nêverda ke a biba pîl. Mi parçeyê bedenê kênaya xo pê destê xo arê dayî. Dozgerî o çax mi rê vat 'kamî kênaya to kişto?' Mi va 'şima hîna hol zanenê.'  Înan waşt mergê kênaya mi mîyan bikerê. La kênaya mi ê teqayîşî de merda. Xeylêk tûtê kurdî kişîyenê. Ma hînî wazena na meseleya kurdan bêra çareserkerdene. Wa tutê ma mekişîyê. Heta ke ez bimira ez do Ceylane xo vîr a nêkera û semedo ke kiştoxî bêrê muhakemekerdene têkoşîn bikera.

Kênaya mi heywanan ra hes kerdêne. A manga aye ra menda. Ê wirdî pîya bibîyêne pîl. Ma tira vanê 'mangaya Ceylane.' Ceylane ra pey fotografêk, manga û dasêk mendî. '' 

 Serekê Komeleya Heqanê Merdiman (ÎHD) a Amedî Abdullah Zeytunî qala dewa û prosesê huqûqî kerde.

Zeytunî pare kerd ke dezgehê muhakeme hema zî xîret keno ke serebûtî krîmînalîze bikero û vat: ''Mehkeme herinda ke kiştoxan bivîna keye de qusûr vînena. Ma tim nê têkoşînê huqûqî de hetê keyeyê Onkolî de yê.''