DEM Partî Kombîyayîşê Heyetê Îdareyanê Herêmîyan ê Demokratîkan  Merkezê Kongre Çand Amedî de kerd. Hemserekê Pêroyî yê DEM Partî Tuncer Bakirhan, Hemserekê Pêroyî yê DBPyî Keskî Bayindir û hemşaredarê bajar û qezayan tewrê ci bîyî.

Badê rêzgirewtişê semedê şehîdan verî Hemşaredarê Bajarê Pîlî yê Amedî Dogan Hatunî qisey kerd. Hatunî vat ê hem semedê xizmetê şarî hem zî semedê haştîye hêvîdar ê.

Tuncer Bakirhanî zî bale ante averşîyayîşanê Rojhaletê Mîyanênî û dinya ser û ard ziwan ke hinî eşkerayo ke sîstemê dinya wina nêeşkeno dewam bikero, haştîye hewce kena. Bakirhanî nê vatî: ''Gerek têkîlîya kurdan û tirkan newe ra bêro xurtkerdene. Birêz Ocalan pêvînayîşê xo de vati Huqûqê wayûbiratîye û pêkerdişê komelkî yo newe. No rayîrê pêkewtişî ra vejîyayîşî ramojneno. Huqûqê wayûbiratîye senî ke Birêz Ocalan vato huqûqê seyyewbînîye yo. Semedê çareserkerdişê meseleya kurdan metno nuştekî yo huqûqî yo derg hewce keno. Gerek  hetê wird hetan ra mutabakatêk bêro pêardene û no biaçarîyo metnêkê nuştekî yê huqûqî.

Gerek meclîs berpirsîyarîye bîgîro xo ser. Haştîye têna bi nîyetî nêbena qanûn hewce keno. 10ê înan ê DEMî 13 şaredarîyan de qeyûm ame cakerdene.Gerek nê qeyûmî peyser bêrê antene. Hemşaredar û sîyasetmedarê cade serbest bêrê veradayene. Medya zî gerek ziwanê xo dişmenkî caverdo.

Birêz Ocalanî semedê prosesê haştîya girde da destpêkerdene. Gerek ma semedê huqûqê wayûbiratîye şewe roje bixebitê.  Şima rolê serkêşî kay kenê. Ameyoxê prosesê çareserîye pabesteyê îradeyê herêmî yo. Ez bawer kena ke şima nê îradeyê raşt şuxulnenê û semedê ardişê haştîye bianorê çîyo ke destê şima ra bêro kenê.''