Hemserekê Konseya Rayberdişî ya KCKyî Cemîl Bayikî roportajêk da Shar Press ke Başûrê Kurdîstanî de weşane keno. 

Bayikî roportajê xo de pare kerd ke PDK destekê îstîxbaratî dano dewleta tirke û cayanê gerîlayan dewleta tirke rê vano. Bayikî vat: ''PDK Ala Rengîne seba ke îşxalê dewleta tirke binimno şuxilneno. Eke PDK na hemkarîya dewleta tirke rê dewam bikero ma nêwazê zî şer do biqewimîyo.''

Cemîl Bayikî ard ziwan ke ganî şarê kurdî têkilîya PDK û Barzanîyan a bi dewleta tirke hol bişinasno û vat: ''PDK bi her hawayî destek dano artêşa tirke, cayanê gerîlayan tesbît keno û dewleta tirke rê vano.''

Bayikî bale ante ser ke Wezîrê Karanê Teberî yê Tirkîya Hakan Fîdanî wextêkî verî keyeyê Barzanîyan de pêvînayîş kerdo û dima Barzanîyan destekê xo yê seba dewleta tirke zêdînayo. 

Bayikî vat: ''Hukmatê Bexdadî waştişanê dewleta tirke qebul nêkeno la Barzanîyî qebul kenê. PDK seba ke leşkeranê tirkan bipawo û binimno Ala Rengîne şuxilneno. Serebûtê Sîdekan û Biradostî dewamê îşxalê dewleta tirke yê. Wina aseno ke serebûtê Biradostî berhemê pêvînayîşê Hakan Fîdan û Barzanîyan o.''

Bayikî bale ante ser ke 18ê êlule de dewleta tirke hêrişê Meydanê Teyarayan ê Erbetî yê Silêmanî kerdbî û vat: ''Seba ke dewleta tirke şarê Silêmanî û herêma Soranî bitersna no hêriş kerd. Dewleta tirke senî ke herêma Behdînanî pê destekê PDKyî kerda merkezê xo û MÎTî, wazena Silêmanî û herêma Soranî zî wina bikera. Dewleta tirke kena ke çimê YNKyî bitersna û sey PDKyî YNKyî zî bikera hemkarê xo.

Şarê Silêmanî û Soranî xeta welatperwerîye ra fek vera nêdanê. Coka dewleta tirke tim hêrişê Silêmanî û herêma Soranî kena. Ma pê bawer ê ke şarê Silêmanî û herêma Soranî heta peynî xeta welatperwerîye de israr bikerê.''