Hemserekê Pêroyî yê Partîya Herêman a Demokratîke (DBP) Keskîn Bayindirî polîtîkayê weçînayîşî yê AKPyî û zîyaretê Başûrî yê Erdoganî ANFyî rê ercnayî.

Bayindirî ard ziwan ke îqtîdarê Erdoganî weçînayîşanê 31ê adare de derbêka girane werda û seba ke nê binkewtişî binimno verê xo dayo konseptê şerî yê neweyî. Bayindirî vat: ''Erdoganî tim kerd ke bi şer û kaosan emrê îqtîdarê xo derg bikero. Nika zî îqtîdarê AKP-MHPyî vera Rojawan û Bşaûrê Kurdîstanî planê şerî yê neweyî keno. Erdogan çarçewa pêvînayîşanê nê şerî de şi Bexdad û Hewlêrî. Her çiqas peymanê ke Bexdad û Hewlêr de ameyê îmzakerdene seyp peymananê ekonomî û bazirganîye biasê zî Erdogan gêreno şerê neweyî. Xûlasa bingeyê zîyaretê Iraqî yê Erdoganî de konseptêkê tasfîyekerdişî yo newe yê vera kurdan est o. Yewî ya neteweyî û paştdayîşê kurdan do nê konseptê şerî pûç bikerê.''

Bayindirî vist vîrî ke sey DBPyî înan tim kerd ke yewîya kurdan awan bikerê. Bayindirî bale ante ser ke PDKyî heta nika destek nêda xîretanê yewîya neteweyîye. Bayindirî vat: ''PDK tim dûştê menfaetanê kurdan de pozîsyonêkî gêno. Destûrê PDKyî ra nêbîyêne ewro Başûr de 70 baregehê dewleta tirke nêbîyayêne. Ma verê cû zî dî ke PDKyî hetkarîya dewleta tirke kerda. PDK bi nê nêzdîbîyayîşê xo zerar dano Herêma Kurdîstanî û pêro kurdan. Kerdena PDKyî kurdan do bida binvistene.''

Bayindirî dîyar kerd ke Erdogan bi ala tirkan Başûr de ameyo pêşwazîkerdene û vat: ''Na rewşe raştîya PDKyî eşkera kena. Erdogan heman roje zîyaretê xo yê Iraqî de bi ala tirkan nêame pêşwazîkerdene. Oyo ke ameyoxê têkilîya Erdogan û PDKyî dîyar bikero tewirê şarê kurdî yo. Ganî şarê Başûr, Şingal û Mexmûrî vera PDKyî nêrazîbîyayîşê xo bimojno. Eke wina bibo hemkarîya dişmenî do bin bikewa.''